Májiliste «Nur Otan» partııasy fraksııasynyń janynan qurylǵan Ulttyq qordan bólinetin bıýdjet qarajattarynyń maqsatty jáne tıimdi jumsalýyn baqylaý jónindegi komıssııanyń tóraıymy Irına Aronovanyń jetekshiligimen otyrys bolyp ótti.
Onda ınfraqurylymdardy damytý jónindegi 2015-2019 jyldarǵa arnalǵan «Nurly jol» memlekettik baǵdarlamasynyń sheńberinde apatty jáne 3 aýysymdy mektepterdi joıý, mektepke deıingi uıymdardaǵy oryn jetispeýshiligin azaıtý máselesi qaraldy. Jazǵy demalysta bul máselelermen dáıekti túrde tanysqan depýtattar qyzý belsendilik kórsetti. Qaralǵan másele boıynsha baıandama jasaǵan jáne barlyq suraqtarǵa jaýap bergen Bilim jáne ǵylym vıse-mınıstri Bıbigúl Asylova boldy. Ol qolynda bar málimetterdi baıandap, elimizdiń keıbir aımaqtarynda áli de apatty jáne 3 aýysymdy mektepterdiń qalyp otyrǵanyn jetkizdi. Ulttyq qordan osy maqsattarǵa bólingen qarajattyń jalpy kólemi 72 mlrd teńge bolǵan. Oǵan 112 mektepte qurylys júrip jatyr, sonyń 56-sy qurylysy burynnan jalǵasýda, al 56-sy jańa mektepter. Bıylǵy jyldyń 1 qyrkúıeginde 52 mektep paıdalanýǵa berilgen. Olardyń ishindegi 45 mektep 2016 jyldan aýysqan, 7 mekteptiń qurylysy bıyl bastalyp, bıyl aıaqtalǵan. Jeti aımaqtyń 42 mektebinde úsh aýysym joıylǵan jáne 5 óńirde 9 apatty mekteptiń ornyna jańa mektep ǵımaraty salynǵan.
Keıbir oblystarda qurylys jumystarynyń syzbaǵa sáıkes bolmaı, daıyndyq sapyna engizilmeı turǵandyǵy jóninde de túsinikter berildi. Depýtat Qudaıbergen Erjan Ońtústik Qazaqstan oblysyndaǵy memlekettik satyp alý jumystary boıynsha eki mekteptiń qurylysy toqtap, 2 mlrd teńge qarajattyń ıgerilmeı qalýynyń qandaı sebebi bar dep surady. Oǵan vıse-mınıstr ońtústiktegi jaǵdaıdy maqtap, barlyq bólingen 17 mlrd teńgeniń 96,7 paıyzy ıgerilip, salynýǵa tıisti 19 mekteptiń 16 paıdalanýǵa berilgenin aıtty. Qalǵan 3 mekteptiń qurylysy jyl aıaǵynda bitedi, dedi B.Asylova. Alaıda depýtat bul jaýapqa qanaǵattanbaı memlekettik satyp alý prosesi boıynsha týǵan daýdan tutastaı bir aýyldyń balalary mektepke bara almaı qaldy, maǵan jaýapty jazbasha, tolyqtaı berýińizdi ótinemin dedi.
Depýtat Abaı Tasbolatov «Qurylys jumystarynyń oryndalý merzimin keıingi ýaqyttarǵa aýystyrý múmkindikteri bar degenińizdi qalaı túsinýge bolady, ol qurylys-montaj jumystary ma, álde aqsha qarajatynyń aýdarylýyna qatysty ma? Osyndaı ózgertýler qandaı qujattarǵa súıenip jasalady?», – dedi depýtat. Oǵan B.Asylova Úkimet bekitken bıýdjettik baǵdarlamalardy jergilikti ákimdikterdiń ótinishi boıynsha mınıstr ózgertetinin aıtty. Alaıda osynyń ózi durys emes ekenin, mınıstrlik Úkimet bekitken baǵdarlamany aıryqsha jaǵdaıda ǵana ózgertýge tıisti ekenin atap ótti.
Basqa depýtattar da ózderin tolǵandyrǵan suraqtaryn qarsha boratty. Sonyń ishinde 18 mln ǵana halqy bar Qazaqstanda úsh aýysymdy mekteptiń áli kúnge tolyqtaı joıylmaı otyrǵanyna depýtattar qynjylys bildirdi. Talqylaý qorytyndylary boıynsha komıssııanyń usynystary ázirlenip, ol shara qoldaný úshin Úkimetke joldanatyn boldy.
Jaqsybaı SAMRAT,
«Egemen Qazaqstan»