Indýstrııalyq-ınnovasııalyq damýdyń 2015-2019 jyldarǵa arnalǵan memlekettik baǵdarlamasy aıasynda Qordaı aýdanynda aıtarlyqtaı jumystar qolǵa alynǵan. О́ńirlik ındýstrııalandyrý kartasyna engizilgen jalpy jobalyq quny 60 mıllıard 281 mıllıon teńgeni quraıtyn 5 joba júzege asýda.
Qordaı aýdanynda ornalasqan «Vetro Invest» jaýapkershiligi shekteýli seriktestigi jel elektr energııasyn óndiredi. Jalpy jobalyq quny 12 753 mıllıon bolatyn seriktestikte 13 turaqty jumys orny ashylatyn bolady. Qazirgi kezde jobanyń birinshi kezegi aıasynda 19 qondyrǵy ornatylyp, joba iske qosyldy. Al búginde kásiporynda 11 adam turaqty jumys ornymen qamtylǵan bolsa, onyń ishinde 5 adam jergilikti turǵyndar bolyp otyr.
Búginde elimizde kásipkerlikke keń óris ashylǵan. Atalǵan joba boıynsha memlekettiń qoldaýy retinde 199,4 gektar jer bólinip berilgen. Sondaı-aq, bul joba «Bıznestiń jol kartasy-2020» baǵdarlamasy aıasynda alynǵan nesıeniń paıyzdyq stavkasyn sýbsıdııalaý tetigi boıynsha qoldaý alǵan. Sonymen qatar, «Pervomaıskıe delıkatesy» jaýapkershiligi shekteýli seriktestiginiń shujyq óndirý sehyn jańartý jobasynyń jalpy quny 223 mıllıon teńgeni quraıdy. Al kásiporyn jylyna 3000 tonna etti qaıta óńdeýge qaýqarly. Bolashaqta 70 turaqty jumys orny ashylatyn kásiporyn memlekettiń qoldaýy retinde «Damý óndiris-II» baǵdarlamasy aıasynda nesıe alǵan.
Qordaı aýdany toǵyz joldyń torabynda ornalasqan. Almaty men Taraz shaharlarynyń arasyn jalǵap turǵan aýdanda tirshilikti tikteýge múmkindik mol. Sondaı-aq, oblys ekonomıkasyn arttyrýda da aıtarlyqtaı úles qosyp otyrǵan aýdanda budan bólek «BioVet KZ», «Alataý Qordaı» jáne «Aurum Deutschland AG» jaýapkershiligi shekteýli seriktestikteri de memlekettiń qoldaýy esebinen júzege asyp otyrǵan jobalar qatarynda. Ekinshi besjyldyq sheńberinde qolǵa alynyp otyrǵan bes joba aýdannyń ǵana emes, oblystyń da damý kórsetkishi bolyp sanalady. Bolashaqta halyqty jumyspen qamtýda jáne óńir ekonomıkasyn arttyryp, áleýetin kóterýge de serpin beretini anyq.
Qordaı aýdany búginde aýyl sharýashylyǵy salasynda da aıtarlyqtaı kórsetkishke qol jetkizip otyr. Aýdandyq aýyl sharýashylyǵy bóliminiń málimetinshe, salaǵa qatysty memlekettik baǵdarlamalar boıynsha da aýdanda birqatar jumystar atqarylǵan. Máselen, «Altyn asyq» baǵdarlamasy boıynsha aǵymdaǵy jyly 335 bas qoı jáne «Qulan» baǵdarlamasy boıynsha 4 bas jylqy satyp alynǵan.
Aımaqtaǵy Qaqpatas aýylynda ornalasqan «Qaqpatas-Qordaı» jaýapkershiligi shekteýli seriktestigi óńirdegi eń iri sharýashylyqtardyń biri. Seriktestik basshysy Dúısehan Qoshalıevtiń aıtýynsha, atalǵan seriktestik 799 mıllıon teńgege taýarly-sút fermasyn qaıta jaraqtandyrý arqyly 600 bas saýyn sıyrǵa arnalǵan Shvesııanyń «Deloval» fırmasymen kelisimge otyryp, zamanaýı jańa qýatty saýyn qondyrǵylaryn óndiriske engizgen. Aldaǵy ýaqytta sharýashylyqtaǵy asyl tuqymdy saýyn sıyrlar sanyn 600 basqa jetkizý josparda bar eken. Sút ónimderin óndirý jáne asyl tuqymdy iri qara mal ósirip, kóbeıtýdi qolǵa alǵan seriktestikte búginde 61 adam jumys isteıdi.
Jalpy, Qordaı aýdanynda bólshek saýda taýar aınalymy, kóterme saýda taýar aınalymy, negizgi kapıtalǵa salynǵan ınvestısııa kólemi de aıtarlyqtaı ósken. Al eldi mekenderdi gazdandyrý boıynsha Qordaı, Stepnoı, Aral, Qalǵuty, Jambyl, Jańaturmys, Sarybulaq, Qaınar, Qasyq, Qaqpatas, Beriktas jáne Betqaınar aýyldarynda gaz jelisi tartylǵan. Bolashaqta qalǵan eldi mekenderdi gazdandyrý máselesi boıynsha naqty jumystar qolǵa alynyp jatyr.
Jambyl oblysynyń ákimi Kárim Kókirekbaev jumys saparymen Qordaı aýdanyna barǵanynda, aýdannyń búgingi damý deńgeıine oń baǵasyn bergen bolatyn. Sondaı-aq, qolǵa alynǵan bes jobanyń artyqshylyqtaryn da atap ótken edi. Oblystyń eń áleýetti aýdany sanalatyn Qordaıda qanaǵattanarlyq tirlik kóp ekenin jergilikti turǵyndar da aıtady. Ásirese memlekettik baǵdarlamalardyń oryndalýy arqyly birinshi kezekte halyqty jumyspen qamtý máselesi oń sheshimin tapqan.
Hamıt ESAMAN,
«Egemen Qazaqstan»
Jambyl oblysy