Golovkın-Alvares: Áıgili boksshylar ne deıdi?

Maık Taıson, amerıkalyq boksshy, asa aýyr salmaqtaǵy absolıýtti álem chempıony:

«Golovkın men Alvarestiń aıqasyn asyǵa kútip júrmin. Bul Meıýezer-MakGregor kezdesýine qaraǵanda áldeqaıda qyzyǵyraq. Kimniń jeńiske jetetinin dóp basyp aıtý ońaı emes. Biraq basymdyqty «Kaneloǵa» berer edim. Ol qazir óz babynda», dedi aty ańyzǵa aınalǵan boksshy Globo Esporte basylymyna bergen suhbatynda.

«Kanelo» 27 jasta, Golovkın 35-te. Onyń ústine Meksıkalyq boksshy jas ta bolsa, otandasymyzǵa qaraǵanda kóbirek jekpe-jek ótkizip úlgerdi. Maık Taıson bálkim osy jaǵyn qaperinde ustap, ári Gennadııdiń sońǵy aıqasyna qarap osylaı degen bolar. Qyzyq málimet. Maık Taıson eń alǵashqy jeńilisine deıin 37 jekpe-jek ótkizip, 33-in nokaýtpen jeńgen eken. Otandasymyz Gennadıı Golovkın de osyǵan deıin 37 márte rıngke kóterilip, 33-inde qarsylasyn esinen tandyrǵan. Árıne, Genaǵa Taısonnyń jolyn qaıtalamaýyn tileımiz.

Karl Froch, brıtan boksshysy, ekinshi orta salmaqtaǵy álemniń eks-chempıony:

«Men Golovkınniń úzdik jyldary artta qaldy dep oılaımyn. Ol qartaıyp barady, sondyqtan Alvares jeńiske jetedi dep sanaımyn. Biraq Golovkın de osal emes, «Kanelony» nokaýtqa túsirýi ábden múmkin. Qansha degenmen bul boks emes pe?! Eger kimniń jeńetinine boljam jasaýym kerek bolsa, Alvaresti tańdaımyn. Meksıkalyqtyń nokaýtpen jeńetinine kúmánim bar. Sondyqtan upaı boıynsha basym túsýi ǵajap emes. Golovkın qazir burynǵydaı emes. GGG meni tań qaldyra almaı júr. Sebebi, kóp soqqylar jiberetin boldy», dedi Karl Froch IFL TV-ǵa bergen suhbatynda.

Dennıel Djeıkobsqa qarsy kezdesýinen keıin birqatar sarapshylar qazaqstandyq boksshynyń 35 jasqa kelýin alǵa tartyp, jasy kelgenin málimdedi. Al Golovkınniń bapkeri Abel Sanches mundaı pikirmen múldem kelispeıdi. Ol qaıta Djeıkobsty orta salmaqtaǵy GGG-dan keıingi ekinshi boksshy ekenin, shákirtiniń oǵan qarsy laıyqty deńgeıde judyryqtasqanyn aıtty.

Roberto Dıýran, panamalyq boksshy, tórt salmaq dárejesinde álemniń eks-chempıony:

«Menińshe, ekeýiniń qaısysy jekpe-jek kúni óz deńgeıinde bolsa, sol jeńiske jetedi. О́z basym Alvareske basymdyq berer edim. Sebebi, Gena Djeıkobsqa qarsy ótkizgen aıqasynda álsiz tustaryn kórsetip qoıdy. Degenmen, Golovkın de nokaýtpen jeńýi múmkin. «Kanelo» onyń soqqylaryna shydas berer me eken?! Bizge osy jaǵy belgisiz bolyp otyr. GGG-di soqqyǵa jyǵý úshin ony barlyq buryshynan urý kerek. Eger ol saǵan tike keler bolsa, nokaýtqa túsirýden taıynbaıdy. Onymen judyryqtasqanda jyldam qozǵalyp, shyr kóbelek aınalyp júrip qarsy soqqy berý kerek», dedi Roberto Dıýran La Prensa basylymyna bergen suhbatynda.

Gennadıı Golovkın sońǵy kezdesýinde Denıel Djeıkobsty nokaýtpen jeńbeýiniń bir qupııasy bolýy múmkin. Ol Saýl Alvarespen kezdesý ótkizgisi keletinin osydan birneshe jyl buryn ashyq aıtqan edi. О́z kezeginde «Kanelo» bul aıqastan qashpaıtynyn birneshe ret málimdegen, alaıda, kelissózderge kelmeı júrdi. Tipti, WBC boıynsha Golovkınmen mindetti jekpe-jekten de bas tartty. Atalǵan belbeýdi esh qarsylyqsyz qazaqstandyq boksshyǵa qaldyryp, ózi basqa salmaqqa aýysyp ketti. Al Djeıkobsqa qarsy aıqasynan keıin Golovkınniń osal tustaryn baıqap, jeńetinine de senimi artqan bolýy múmkin. Qysqasyn aıtqanda 18 naýryzdaǵy kezdesý Golovkınniń «Kaneloǵa» qurǵan qaqpany bolýy ǵajap emes.

Mennı Pakıao, segiz salmaq dárejesi boıynsha álem chempıony atanǵan jalǵyz boksshy (59 jekpe-jek, 6 teń, 2 jeńilis, 38 nokaýt):

«Boksshylar úshin de, kórermender úshin de úlken aıqas bolary sózsiz. Sondyqtan naqty bir boljam aıtý da ońaı emes. Golovkın de, Alvares te myqty boksshy. Biraq menińshe, GGG sál irileý bolǵandyqtan azdaǵan basymdyqqa ıe», dedi Voxingscene.com basylymyna bergen suhbatynda.

Árıne, boksta salmaq dárejesi úlken ról atqarady. Degenmen, qos sportshynyń da bir salmaqta judyryqtasatynyn esten shyǵarmaǵan jón.

Kishi Floıd Meıýezer, amerıkalyq boksshy, bes salmaq dárejesinde álemniń eks-chempıony:

«Golovkınniń soqqylary joıqyn ekenine kúmánim joq. Biraq ol baıaý qozǵalady, sondaı-aq qatelikteri de kóp. Onyń Alvaresti jeńetinine kúmánim bar. «Kanelo» qazirgi ýaqytta úzdik boksshylardyń biri. Ony qatty syılaımyn ári GGG-dan aılasyn asyraryna senimdimin. Bul jekpe-jek 12 raýndqa deıin sozylady dep oılaımyn», dep jazdy onyń sózin Boxingnews24.com basylymy.

Meıýezer Golovkınniń áıgili qarsylastarynyń biri. Qazaqstandyq boksshy týraly jaǵymsyz pikir aıtqandy unatady dep te aıtýǵa bolady. Al óz kezeginde otandasymyz ony birneshe ret sharshy alańda kúsh synasyp kórýge shaqyrǵan bolatyn. Meıýezermen judyryqtasý úshin tipti, salmaǵyn azaıtýǵa deıin kelisetinin aıtqan edi. Alaıda, Floıd osyǵan deıin birqatar ataqty boksshylardy jeńgenin alǵa tartyp, Genanyń usynysynan úzildi-kesildi bas tartqan bolatyn.  

Andre Ýord, amerıkalyq boksshy, jartylaı aýyr salmaqta WBA (Super), WBO jáne IBF nusqalary boıynsha álem chempıony:

«Eger syrttaı qaraıtyn bolsaq, Golovkınniń «Kanelodan» irileý ekeni anyq kórinip tur. Biraq bul Golovkınge basymdyq bere qoıar ma eken?! Alvares onyń joıqyn soqqylaryna tótep bere ala ma?! Mine, osy eki jaıt maǵan da qyzyq bolyp tur. Kimniń jeńiske jetetinin naqty aıtý qıyn. Bir ǵana joıqyn soqqy kezdesýdiń taǵdyryn ǵana emes boksshynyń da karerasyn kúrt ózgertip jiberýi múmkin. Bul jekpe-jekte ne bolaryn, kimniń jeńiske jeterin ózim de bilmeımin. Bir aıtarym, bul naǵyz boks bolmaq. Munda barlyǵy bar. Jankúıerler uzaqqa deıin osy kezdesýdi talqylaıtynyna senimdimin», dedi ol. Ýordtyń bul pikirin ESPN basylymy habarlady.

Aıta keter taǵy bir jaıt, boksta belbeýdi qorǵaǵannan, qaıta oǵan úmitker bolǵan jeńilirek. Sebebi, Golovkın jeńiletin bolsa, búkil ataǵynan aıyrylyp, bárin basynan bastaýyna týra keledi. Al Alvares ese jiberse joǵaltatyn túgi joq dep aıtýǵa bolady.

Kishi Hýlıo Sezar Chaves, meksıkalyq boksshy, WBC nusqasy boıynsha álemniń eks-chempıony:

«Bul óte jaqsy jekpe-jek bolmaq. Bul jerde bir másele bar, «Kanelo» GGG-diń ádisine qarsy turyp, óz ónerin kórsete ala ma? Meniń oıymsha Alvares qarsylyq tanyta almaıdy. Jekpe-jektiń basynda «Kanelo» Golovkınge ses kórsete alar ma eken? О́z basym sońǵy raýndtarda GGG-diń nokaýtpen jeńetinine bás qoıamyn», dep jazdy kishi Chaves óz ınstagramynda.

Saýl Alvares sońǵy kezdesýin dál osy otandasy kishi Chaveske qarsy ótkizgen. Nátıjesinde, tóreshilerdiń biraýyz sheshimimen «Kanelo» jeńiske jetken bolatyn. Sondyqtan, Alvarestiń basym ári osal tustaryn osy boksshy jaqsy biledi dep aıtýǵa bolady. Dál osy boks keshiniń sońynda Alvares kelesi aıqasyn Golovkınge qarsy ótkizetinin resmı túrde málimdedi.

Kishi Krıs Iýbenk, brıtan boksshysy, ekinshi orta salmaqtaǵy IBO belbeýiniń ıegeri:

«Eger «Kanelo» rıngke senimdi túrde shyǵar bolsa, jeńiske jetedi. Menińshe, ótken jyly Golovkınniń kúshinen seskengendikten belinde turǵan belbeýin esh qarsylyqsyz berdi. Bul onyń osyndaı qadamǵa barýynyń jalǵyz sebebi. Al eger Alvares GGG-diń shama-sharqyn oılap, ishteı júreksinip shyǵar bolsa, jeńisten dámetpese de bolady», dedi kishi Iýbenk boxingnewstoday.net basylymyna bergen suhbatynda.

Árıne, qandaı boksshy bolmasyn sharshy alańǵa psıhologııalyq daıyndyqpen shyǵýy kerek. Eger árbir sportshy rıngke qarsylasynan seskenip shyǵar bolsa, qansha jerden kúshti bolǵanmen, jeńiske jetýi ekitalaı.

Denıel Djeıkobs, amerıkalyq boksshy, Golovkınniń sońǵy qarsylasy:

«Golovkınniń osal tustaryn men ashyp kórsettim. Dál osy kezdesýdegideı Genanyń qoldaryn tómen túsirip judyryqtasqanyn kórmegenderińizge senimdimin. Shyny kerek, bul jekpe-jekte kimniń jeńetini maǵan bári-bir. Biraq GGG sál irileý bolǵandyqtan jeńiske jetýi múmkin. Osy aıqastyń jeńimpazymen kúsh synasýǵa daıynmyn», dedi Boxingnews24.com tilshisine bergen suhbatynda.

Syrttaı qaraǵan adam «jeńilgen kúreske toımaıdy» degen osy bolar degen pikirde qalýy múmkin. Árıne, Djeıkobstyń asa qaterli aýrýdan jazylyp shyǵyp, Golovkındeı boksshymen laıyqty deńgeıde judyryqtasyp shyǵýy erlikke para-par. Biraq joǵaryda aıtylǵandaı bul otandasymyzdyń Alvareske arnaıy ázirlegen jospary bolýy ábden múmkin.

Esterińizge sala keteıik, Gennadıı Golovkın men Saýl Alvares arasyndaǵy kezdesý 16 qyrkúıek kúni, ıaǵnı osy senbide (Astana ýaqytymen 17 qyrkúıek, jeksenbi) Las-Vegastaǵy T-Mobile arenasynda ótedi. Bul kezdesýge GGG enshisindegi barlyq belbeýin (WBA (Super), IBO, WBC jáne IBF) qoısa, «Kanelo» The Ring ataǵyn sarapqa salmaq.

Aıta keterlik taǵy bir jaıt, Gennadıı osyǵan deıin 37 kezdesý ótkizip, bárinde jeńiske jetti. Onyń 33-in nokaýtpen aıaqtady. Al Saýl Alvares 49 aıqastyń 34-inde qarsylasyn nokaýtqa jiberse, bireýinde jeńilip, taǵy birinde teń tústi.

Daıyndaǵan Aıan ÁBDÝÁLI, «Egemen Qazaqstan»