Búgin «Habar» arnasynda «Dáýren Abaevpen ashyq dıalog» baǵdarlamasynyń kezekti shyǵarylymy kórsetildi.
Baǵdarlama barysynda QR Aqparat jáne kommýnıkasııalar mınıstri Dáýren Abaev baǵdarlama júrgizýshisi Mıhaıl Dorofeevtiń qoıǵan ózekti suraqtaryna jaýap berdi.
Alǵashqy talqylanǵan másele ótken birneshe aı kóleminde oryn alǵan mańyzdy taqyryptar tóńireginde boldy.
«О́tken jaz jańalyqtarǵa toly boldy. Sonyń ishinde EKSPO kórmesiniń ótkizilýin atap ótkim keledi. Shara elimizge oń áser etkeni sózsiz anyq. Bul týraly Elbasymyz N. Nazarbaev ta, kórmeni tamashalaýǵa kelgen qonaqtar da aıtyp jatyr. Budan bólek, ózge de jańalyqtar boldy: latynǵa kóshý, jańa oqýlyqtar, medısınalyq saqtandyrý. Biraq men erekshe nazardy Islam Yntymaqtastyq Uıymynyń sammıtine aýdarǵym keledi. 83 delegasııanyń basyn bir jerde qosyp, sammıt ótkizý - myqty el úshin de ońaı sharýa emes,» dedi mınıstr.
Dáýren Áskerbekulynyń paıymdaýynsha, OIU sammıtiniń mártebesi Eýropadaǵy Qaýipsizdik jáne Yntymaqtastyq Uıymy sammıtin ótkizýden kem túspeıdi. Búkil Islam áleminiń ókilderin jınap, úlken shara ótkizý - Elbasymyzdyń abyroıynyń arqasynda júzege asty deıdi mınıstr.
«83 delegattyń 15-i memleket basshylary boldy. Sammıttiń taqyrybyna da erekshe nazar aýdarǵym keledi – ǵylym, ınnovasııa, tehnologııa jáne jańǵyrý. Bul taqyrypty Nursultan Ábishuly usyndy. Qazirgi tańda ıslam álemine radıkaldaný qaýpi tónip tur. Sondyqtan tańdalǵan taqyryp óte oryndy ári mańyzdy boldy dep oılaımyn. Astanada qabyldanǵan deklarasııa búkil Islam áleminiń damýyna úlken áser beretinine senemin», dep málimdedi Dáýren Abaev.
Esterińizge sala keteıik, apta saıyn «Habar» arnasynda «Dáýren Abaevpen ashyq dıalog» baǵdarlamasy kórsetiledi. Baǵdarlama barysynda mınıstr ózekti jańalyqtarǵa toqtalyp, mańyzdy suraqtarǵa jaýap beredi.