Astanada «Qazaqstannyń 100 jańa esimi» jobasy boıynsha jumys jáne sarapshylar tobynyń kezekti otyrysy ótti. Otyrysqa Aqparat jáne kommýnıkasııalar mınıstri Dáýren Abaev, Qazaqstan halqy assambleıasy tóraǵasynyń orynbasary Darhan Myńbaı jáne joba uıymdastyrýshylary, qoǵam belsendileri qatysty.
Bıyl 7 maýsymnan bastap 15 qyrkúıekke deıin elimizdiń túkpir-túkpirinen jobaǵa qatysýshylardan ótinishter qabyldandy. Osy ýaqyt ishinde El.kz portalynda 2212 kandıdat tirkeldi. Qazirgi kúni olardy irikteý jumystary júrgizilip jatyr. Mınıstrdiń sózinshe, arnaıy komıssııa toby tańdaýly 515 úmitkerden 300 adamdy iriktep alady.
«Qazan aıynyń basyna josparlanyp otyrǵan onlaın daýys berýge 300 úmitkerdi irikteý úshin sizderdiń usynystaryńyzdy kútemiz. Barsha qazaqstandyqtar daýys berýge belsene qatysady dep oılaımyn. Barlyǵyńyzdy osy iske shaqyramyz. Jalpy halyqtyq daýys berý qazan aıynyń sońy aıaqtalady. Osydan keıin baryp Qazaqstannyń 100 jańa esimi naqtylanatyn bolady», – degen mınıstr «Rýhanı jańǵyrý» baǵdarlamasynyń aıasynda iske asyrylyp jatqan atalǵan jobanyń ónerimen, bilimimen, qoǵamǵa sińirgen eńbegimen, erekshe qasıetimen daralanǵan talantty azamattarǵa úlken múmkindik ekenin aıtty.
Qazaqstan halqy assambleıasy tóraǵasynyń orynbasary Darhan Myńbaı óz kezeginde bul baǵytty iske asyrý boıynsha júıeli sharalardy qolǵa alǵan assambleıanyń jumys retine toqtalyp ótti.
– Jobaǵa qoǵamdyq uıymdar men assambleıanyń qurylymdary óz tarapynan úmitkerlerdi usyndy. 15 qyrkúıekte ótinimderdi qabyldaý aıaqtalady. Odan keıingi jumys algorıtmin birge jasaımyz. Joba bastalǵaly beri assambleıa 520 ómirbaıan tirkedi, aımaqtardan 900-ge tarta usynys jasaldy, – dedi assambleıa tóraǵasynyń orynbasary Darhan Myńbaı.
Al «Qazkontent» AQ basqarmasynyń tóraǵasy Evgenıı Kochetovtiń aıtýynsha, irikteýdiń kelesi kezeńi 2 qazanda bastalady.
– El.kz redaksııasy 100esim.el.kz saıtyna kelgen barlyq ótinishterdi qabyldap, óńdedi. О́ńdeý eki kezeńmen júrgizildi. Birinshi kezeń de jergilikti atqarý organdarymen faktchekıng jasaldy. Bul adamdar ómirde bar ma, ótinishte aıtqan derekteri shyndyqqa janasa ma? Osy máseleler tekserildi. Ekinshi kezeńde redaksııalyq óńdeý jasalyp, ótinishter saıtta jarııalandy. Qazirgi sátte saıtta 2112 ótinish jarııalanǵan. Endi 2 qazanda irikteýdiń ekinshi kezeńi bastalady, – degen basqarma tóraǵasy daýys berýdiń ádil túrde júrgiziletindigin atap ótti.
Iаǵnı, saıtqa tirkelý elektrondy pochta men áleýmettik jelilerdegi akkaýnttar arqyly júrgiziledi. Qoldanýshylar eń kóp degende úsh tulǵaǵa bir ret qana daýys bere alady. Daýys sany avtomatty túrde kórinip turady. Sarapshylardyń málimetinshe, ázirge deıin iriktelgen úmitkerlerdiń 70 paıyzyna jýyǵy er adamdar, 33 paıyzy áıel adamdar.
Aıa О́MIRTAI,
«Egemen Qazaqstan»