Azyq-túlik taýarlary baǵalarynyń maýsymdyq tómendeýine qaramastan bıylǵy jyldyń basynan bastap pııaz, sábiz, qyzylsha, qoı eti jáne sıyr eti baǵalarynyń ósimi baıqalǵan. Sonymen qatar, jumyrtqa, qaraqumyq, qyryqqabat, qant jáne kúnbaǵys maıy baǵasynyń arzandaýy tirkelgen. Azyq-túliktik emes taýarlar boıynsha baǵalardyń eń kóp ósimi dızel otynyna, benzınge, suıyltylǵan gazǵa, matalarǵa, keńse taýarlaryna, aıaq kıim men qatty otynǵa qatysty bolyp otyr. Bul týraly búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda Ulttyq ekonomıka mınıstri Tımýr Súleımenov aıtty.
Otyrysta bıylǵy jyldyń 9 aıyndaǵy ınflıasııa deńgeıi jáne ony aǵymdaǵy jyldyń sońyna deıin ustap turý sharalary týraly másele qaralǵan bolatyn. Mınıstrdiń málimdeýinshe, jyl basynan beri respýblıkada ınflıasııalyq úderister baıaýlaǵan. Bıyl qyrkúıek aıynda ınflıasııa 3 paıyz, al jalpy jyldyń basynan beri 4,2 paıyzdy qurady. Baıaýlaýdyń negizgi faktorlary valıýtalyq naryqtaǵy jaǵdaıdyń turaqtanýy, naryqtyń birqalypty ınflıasııalyq boljamdary, sondaı-aq azyq-túlik taýarlarynyń negizgi túrleri boıynsha ónimder shyǵarýdyń ósýi bolyp otyr. Mınıstrdiń aıtýynsha, azyq-túlik taýarlarynyń baǵalary sońǵy úsh aı qatarynan tómendeýde. Oǵan qosa, baǵalar men aqyly qyzmet kórsetýlerge tarıfter birqalypty qarqynmen ósýde.
Táýekelderdiń ornyn toltyrý úshin Úkimet áleýmettik mańyzy bar azyq-túlik taýarlaryna jáne qyzmet kórsetýlerge baǵalar men tarıfterdiń negizsiz ósýine jol bermeý sharalaryn qoldandy.
Osyǵan baılanysty óńirlerdiń ákimderine Aýyl sharýashylyǵy mınıstrligimen birge О́ńirlik turaqtandyrý qorlarynda negizgi azyq-túlik taýalarynyń jetkilikti qoryn qamtamasyz etý qajet. Sondaı-aq, kún saıyn baǵalarǵa monıtorıng jasaý jáne naryqta qajetti áleýmettik mańyzy bar azyq-túlik taýarlarynyń jetispeýshiligi men ysyrap bolýyna jol bermeý úshin turaqtandyrý qorlarynyń resýrstaryn tıimdi paıdalaný kerek.
Energetıka mınıstrligine óńirlerdiń ákimderimen birge jylý berý maýsymynda janar-jaǵarmaı materıaldaryna baǵalardyń negizsiz ósýine jol bermeý úshin sáıkes jumys júrgizý qajet.
Joǵaryda atalǵan aldyn alý sharalaryn eskergende 2017 jyldyń qorytyndysy boıynsha ınflıasııa deńgeıi 6,9-7,5 paıyz aýqymynda bolady dep kútilýde, bul josparlanǵan deńgeıge sáıkes keledi.
Dınara BITIK, «Egemen Qazaqstan»