Almaty túbinde apatqa ushyraǵan sanavıasııa ushaǵynyń bortynda bolǵan dárigerlerdiń aty-jónderi anyqtaldy, - dep habarlaıdy Densaýlyq saqtaý mınıstrliginiń baspasóz qyzmeti.
Vedomstvo ókilderiniń málimetinshe, 3 qazanda keshki ýaqytta Almatydan Shymkentke dárigerler brıgadasy aýyr jaǵdaıda jatqan júkti áıelge kómektesý úshin attanǵan.
«Almatydan sanıtarlyq avıasııa brıgadasy saǵat 18.39-da ushyp shyqqan. Bortta Akýsherııa, gınekologııa jáne perınatalogııa ǵylymı ortalyǵynyń professory, dáriger akýsher-gınekolog Patsaev Talǵat Anapıuly men Kardıologııa jáne ishki aýrýlar ǵylymı-zertteý ınstıtýtynyń reanımatolog dárigeri Artyqbaev Jánibek Túkenuly bolǵan», - delingen habarlamada.
Bortta naýqastyń bolmaǵany aıtylady. Respýblıkalyq sanıtarlyq avıasııa ortalyǵy men East Wing áýekompanııasynyń kelisimsharty boıynsha AN-28 ushaǵymen jolǵa shyqqan. Bortpen baılanys úzilgen. Almaty túbinde tabylǵan ushaqtan 5 adamnyń máıiti tabylǵan.
«QR Densaýlyq saqtaý mınıstrligi qyzmettik mindetin atqarý kezinde qaza tapqan medısına qyzmetkerleriniń otbasyna kóńil aıtady jáne moraldyq ári materıaldyq kómek kórsetedi», - dedi baspasóz qyzmetindegiler.
Qaza tapqan qalǵan úsheýi, Azamattyq avıasııa komıteti ókilderiniń habary boıynsha, ekıpajdyń músheleri bolǵan. Olar – Qyrǵyzstan azamaty, áýe kemesiniń komandıri G.N.Soı men qazaqstandyq E.Kýtafın.
Keshe East Wing áýekompanııasynyń AN-28 ushaǵy ushyp shyqqannan keıin 12 mınýt ótkende radardan joǵalyp ketken edi. Keıin ushaq Almaty túbinde órtenip jatqan jerinen tabylǵan. Bortta bolǵan bes adam túgel qaza tapqan. Áýe kemesi Polshada 1990 jyly shyǵarylǵan.