Qasym-Jomart Toqaevtyń tóraǵalyq etýimen Parlament Senatynyń otyrysy boldy.
Senatorlar Eýrazııalyq ekonomıkalyq odaqqa múshe memleketter arasyndaǵy qyzmettik jáne azamattyq qarýdy ótkizý týraly kelisimdi ratıfıkasııalady.
Kelisim qyzmettik jáne azamattyq qarýdy ótkizý men onyń ishki tranzıtine baılanysty qatynastardy, sondaı-aq Eýrazııalyq ekonomıkalyq odaqqa múshe memleketterdiń quzyretti organdary arasynda osyndaı ótkizý men ishki tranzıtti memlekettik baqylaýǵa baılanysty máseleler boıynsha ózara is-qımyl jasaýdy retteýge baǵyttalǵan.
Osy Kelisimmen qyzmettik jáne azamattyq qarýdy ótkizý men onyń ishki tranzıti júzege asyrylatyn jaǵdaılardyń tizbesi rettelgen, Eýrazııalyq ekonomıkalyq komıssııa bekitetin nysan boıynsha biryńǵaı qujat negizinde mindetti ruqsat berý tártibi belgilengen.
Kelisimdi ratıfıkasııalaý osy qarý túrin EAEO-ǵa qatysýshy elderdiń aýmaǵynda ótkizýdi ońaılatýǵa, naqty aıtqanda qarýdy ákelý jáne áketý úshin ruqsat berý qujattaryn berý merzimin qysqartýǵa múmkindik beredi.
Qazaqstan men Serbııa arasyndaǵy qylmystyq ister boıynsha quqyqtyq kómek týraly ekijaqty shart ratıfıkasııalandy. Qujat memleketter arasyndaǵy qylmystyq ister boıynsha quqyqtyq kómekti iske asyrýdyń uıymdastyrý-quqyqtyq tetikterin egjeı-tegjeıli retteıdi. Immýnıtet, bank esep-shottary men qarjy-qarajat aqparatyn aıqyndaý, zattar men qujattardy qaıtarý, aqparattardy, shyǵystardy erikti túrde berý, sottalǵandyǵy týraly aqparatty almasý, qujattar men materıaldardy zańdastyrýdan bosatý máselelerine jekelegen erejeler arnalyp otyr.
Palata Qazaqstan men Serbııa arasyndaǵy adamdardy ustap berý týraly shartty da ratıfıkasııalady. Bul qujat qylmystyq izdestirýden jasyrynyp júrgen, sondaı-aq jazadan jaltaryp júrgen adamdardy ustap berý máseleleri boıynsha eki eldiń quzyretti organdary arasyndaǵy yntymaqtastyqtyń quqyqtyq negizderin retteıdi.
Otyrysta sondaı-aq sottalǵan adamdardy berý týraly Qazaqstan men Serbııa qol qoıǵan shart ta ratıfıkasııalandy. Qujat sottalǵan adamdardy ońaltýǵa jáne áleýmettik ortaǵa qaıta oralýǵa járdemdesý maqsatynda olardy berý salasyndaǵy yntymaqtastyqty ornatýǵa, sondaı-aq sottalǵan adamdarǵa óziniń elinde jazasyn óteýge múmkindik jasaýǵa baǵyttalǵan.
Otyrys barysynda senator Dınar Nóketaevanyń balalar men jasóspirimder kitaphanasyn ashý qajettigi týraly; senator Álı Bektaevtyń Ońtústik Qazaqstan oblysyndaǵy gaz qubyrynyń qurylysyn aıaqtaýǵa jáne balalar baqshasynyń qurylysyna qarjy bólý týraly; senator Álimjan Qurtaevtyń Ońtústik Qazaqstan oblysyndaǵy «Bıznestiń jol kartasy-2020» baǵdarlamasy aıasyndaǵy jobalardy iske asyrý úshin qosymsha qarjy bólý týraly depýtattyq saýaldary jarııa etildi.