Búgin Premer-Mınıstr Baqytjan Saǵyntaevtyń tóraǵalyǵymen ótken QR Úkimetiniń otyrysy barysynda 2017 jyldyń qańtar-qyrkúıek aılaryndaǵy Qazaqstannyń áleýmettik-ekonomıkalyq damýynyń qorytyndysy qaraldy.
Ulttyq ekonomıka mınıstri Tımýr Súleımenov Qazaqstan ekonomıkasy eseptik kezeńde qańtar-tamyz aılarynda jınaqtalǵan ósim qarqynyn 4,3% deńgeıinde saqtaǵanyn aıtty. Buǵan makroekonomıkalyq turaqtylyq pen ınvestısııalyq belsendilik, sondaı-aq syrtqy naryqtardaǵy qolaıly jaǵdaılar yqpal etýde.
Memlekettik jáne salalyq baǵdarlamalar aıasynda qabyldanǵan sharalardyń arqasynda ekonomıkanyń barlyq salalarynda oń úrdis baıqalatyny atalyp ótti. О́simniń negizgi qozǵaýshylary ónerkásip, qurylys, saýda, kólik jáne baılanys boldy.
О́nerkásipte jyl basynan beri turaqty ósim baıqalýda, qańtar-qyrkúıekte 8,3%-dy qurady. Taý-ken ónerkásibinde óndiris kólemi 11,3%-ǵa ulǵaıdy. О́ńdeý ónerkásibiniń ósimi 5,7%-dy qurady. Ishki naryqqa baǵdarlanǵan salalarda eleýli ósim baıqalýda, sonyń ishinde farmasevtıkalyq ónimder shyǵarý, jeńil ónerkásip, azyq-túlik ónimderi men sýsyndar, sondaı-aq, munaı ónimderi óndirisi.
Eksportqa baǵdarlanǵan salalarda da ósimniń turaqty qarqyny baıqalýda, máselen, qara metallýrgııa óndirisi 7,8%-ǵa, tústi metalldar óndirisi 6,6%-ǵa ósken.
Aýyl sharýashylyǵynda ósim 1,9% deńgeıinde saqtalǵan, sondaı-aq, qurylys qańtar-tamyz aılaryndaǵy 0,1%-dan osy jyldyń 9 aıynda 3,5%-ǵa deıin artqan.
Ekonomıkanyń naqty sektoryndaǵy joǵarǵy ósim qyzmet kórsetý salasynyń turaqty ósim jolyna birte-birte shyǵýymen súıemeldenedi. Osy jyldyń 9 aıynda kólik qyzmetteri 4,7%-ǵa, saýda jáne baılanys — 3%-ǵa, jyljymaıtyn múlik operasııalary — 2,1%-ǵa artqan.
Ekonomıka damýyna oń áserin berip jatqan ınvestısııalar ósiminiń dınamıkasy jaqsaryp keledi. 2017 jyldyń 9 aıynda negizgi kapıtalǵa salynǵan ınvestısııalar kólemi 4,4%-ǵa ósti. Saýda men qurylysta ınvestısıalardyń eń kóp ósimi baıqalýda, sonymen qatar jylýmen jáne sýmen qamtý jelilerinde júrgizilgen jańǵyrtý jumystarynyń nátıjesinde ónerkásipte de ınvestısııalar ósimi baıqalyp tur.
Negizgi kapıtalǵa ınvestısııalar ósimi aldymen ishki kózdermen qamtamasyz etildi, al qarjylandyrýdyń syrtqy kózderinde tómendeý baıqalady.
Turaqty makroekonomıkalyq jaǵdaı turǵysynan, tikeleı sheteldik ınvestısııalardyń jalpy túsimi 2017 jyldyń I jartyjyldyǵynda $10,5 mlrd-qa deıin 8,6%-ǵa ósti. Qazan aıynyń basyndaǵy jaǵdaı boıynsha elimizdiń halyqaralyq qory altyn-valıýta saqtyq qorlarynyń 10,2%-ǵa ósýi esebinen $89,4 mlrd-ty qurady.
Toǵyz aıdyń qorytyndylary áleýmettik-ekonomıkalyq ósimniń barlyq salalarynda oń qarqynnyń saqtalǵanyn kórsetedi. Osyny eskere otyryp, jyl qorytyndysy boıynsha kem degende 3,4% deńgeıinde ekonomıka ósimi oryn alady dep boljanǵan.