Memleket basshysy Nursultan Nazarbaev Premer-Mınıstrdiń orynbasary – Aýyl sharýashylyǵy mınıstri Asqar Myrzahmetovti qabyldady, dep habarlady Prezıdenttiń baspasóz qyzmeti.
Kezdesýde elimizdiń agroónerkásiptik keshenin damytý baǵdarlamasy arqyly atqarylǵan jumystardyń aralyq nátıjeleri jáne ony odan ári iske asyrý jónindegi josparlar talqylandy.
Nursultan Nazarbaev elimizdiń barlyq dıqandaryn astyq jınaý naýqanynyń tabysty aıaqtalýymen quttyqtady.
– Jaz aılarynyń basyndaǵy kúrdeli jaǵdaıǵa qaramastan, aýyl eńbekkerleri aıtarlyqtaı kólemde astyq jınady. Ishki qajettilikti qanaǵattandyrýǵa jáne ónimimizdi eksportqa shyǵarýǵa múmkindik bar. Jalpy, barlyq málimetter oń qarqyndy kórsetip otyr, – dedi Qazaqstan Prezıdenti.
Memleket basshysy aýyl sharýashylyǵynyń el ekonomıkasyndaǵy mańyzdy róline toqtalyp, osy salaǵa bólingen qarjyny paıdalanýdyń tıimdiligi tómen ekenin atap ótti.
– Agrarlyq sektor ekonomıkamyzdyń qozǵaýshy kúshi bolyp sanalady. Oǵan memleket kóp qarjy quıyp jatyr. Onyń tıisti qaıtarymy bolýǵa tıis edi, biraq, ókinishke qaraı, olaı bolmaı otyr, – dedi Nursultan Nazarbaev.
Sonymen birge Qazaqstan Prezıdenti bıylǵy astyq jınaý naýqany joǵary qarqynmen júrgizilgenin aıtty.
– Bıyl 21,7 mıllıon tonna astyq jınalyp, ortasha ónimdilik gektaryna 14,2 sentnerden boldy. Bul byltyrǵy jylmen salystyrǵanda, kóbirek. Belgilengen josparǵa sáıkes, biz tutynýshylyq kooperasııany damytýmen, tuqymdyq qordy jaqsartýmen jáne mal sharýashylyǵynyń ónimdiligin arttyrýmen aınalystyq, – dedi Elbasy.
Nursultan Nazarbaev aýyl sharýashylyǵy ónimdiliginiń kólemin elimizdiń ǵylymı áleýetin paıdalana otyryp arttyrý qajettigine nazar aýdardy. Asqar Myrzahmetov Qazaqstan Prezıdentine agroónerkásiptik keshenniń memlekettik baǵdarlamasy aıasynda aýyl sharýashylyǵynyń 12 basym baǵytyn odan ári damytýdyń arnaıy kartalaryn ázirleý barysy jóninde baıandady.
Sońynda Memleket basshysy birqatar naqty tapsyrma berdi.
Sýret Prezıdenttiń baspasóz qyzmetinen alyndy