Keshe elordanyń «Rıksos» qonaqúıinde «Astana prosesi» sheńberindegi Sırııadaǵy daǵdarysty qalpyna keltirý jónindegi halyqaralyq kelissózderdiń jetinshi raýndy bastaldy. Ol eki kúnge sozylyp, búgin keshke kezdesý qorytyndysy boıynsha brıfıng ótkiziledi dep kútilýde.
Kelissóz qorytyndylarynyń oryndalýyna kepilger memleketter retinde qatysýshy Reseı Federasııasynyń delegasııasyn Reseı Prezıdentiniń Sırııa jónindegi arnaıy ókili Aleksandr Lavrentev, Túrkııa delegasııasyn Syrtqy ister mınıstriniń orynbasary Sedat Onal, Iran delegasııasyn Syrtqy ister mınıstriniń orynbasary Hýseın Djaberı Ansarı basshylyq etýde.
Kezdesýge Sırııa úkimeti men sırııalyq oppozısııanyń, sondaı-aq baıqaýshy retinde BUU, AQSh jáne Iordanııanyń ókilderi qatysty. Is-sharanyń bastalýynan bir kún buryn kepilger-elderdiń ókilderi sarapshylar deńgeıinde ekijaqty jáne úshjaqty konsýltasııalar ótkizgen bolatyn. Jalpy otyrys barlyq taraptyń qatysýymen búgin, ıaǵnı 31 qazanda ótedi.
Aldaǵy kezdesý Sırııada urys is-qımyldaryn doǵarý rejimin nyǵaıtý boıynsha qol jetkizilgen nátıjelerdi saqtaýǵa, sondaı-aq daǵdarysty saıası retteýge ótý kezeńinde atalǵan eldegi jaǵdaıdy ári qaraı turaqtandyrý sheńberinde kúsh-jigerlerdi arttyrýǵa baǵyttalǵan.
Buǵan deıin Qazaqstan Syrtqy ister mınıstrligi joǵary deńgeıde ótetin kelissózde tutqyndardy jáne qamaýda otyrǵandardy bosatý, qaza tapqandardyń denelerin berý jáne iz-túzsiz joǵalǵandardy izdestirý boıynsha jumys tobynyń erejesin bekitý josparlanǵanyn habarlaǵan bolatyn. Taraptar sonymen qatar halyqaralyq terrorızmmen kúres máselelerin qarastyryp, Sırııada mınadan tazartý jumystaryn júrgizý týraly birlesken málimdeme qabyldamaq nıette.
«Egemen-aqparat»