Astanada óńirlik aqparattyq-túsindirý tobynyń múshelerine arnalǵan «Halyqtyń dintaný saýattylyǵyn arttyrý máseleleri boıynsha aqparattyq-túsindirý jumystarynyń tıimdiligi» taqyryby boıynsha eki kúndik semınar ótti. Jıyndy Din isteri jáne azamattyq qoǵam mınıstrliginiń Din isteri komıteti uıymdastyrdy.
Sharaǵa Din isteri jáne azamattyq qoǵam mınıstrligi Din isteri komıtetiniń basshylyǵy, Bilim jáne ǵylym mınıstrliginiń, Ulttyq qaýipsizdik komıteti Terrorızmge qarsy kúres ortalyǵynyń, Mádenıetter men dinderdiń halyqaralyq ortalyǵynyń, óńirlik din isteri basqarmalarynyń ókilderi, aqparattyq-túsindirý tobynyń músheleri, barlyq óńirden ǵalymdar, teologter, dintanýshylar qatysty.
Din isteri komıteti tóraǵasynyń orynbasary E.Ońǵarbaev óz sózinde: «Ekstremızmmen kúrestiń basty quraly retinde aqparattyq túsindirý toptary jumystarynyń tıimdiligin arttyrý qajet», dedi. Ol semınarda alǵan bilimdi óńirlerdegi arnaıy toptarmen jumys júrgizýde paıdalanýdy usyndy.
Sondaı-aq «Ańsar» keńes berý-ońaltý ortalyǵynyń dırektory A.Sabdın sottalǵandar men destrýktıvti dinı aǵymdardyń qurbandaryn ońaltý taqyrybynda trenıng ótkizdi.
– Trenıngte deradıkaldanýdy quraýshy argýmentteý jáne kontrargýmentteý taqyryby qozǵaldy. Argýmentteý degenimiz – dástúrli dinı tanymymyzdy kúsheıtetin jáne qoǵamymyzda basym bolǵan qundylyqtardy rastaıtyn dálelder jınaǵyn jasaý. Al kontrargýmentteý, bul – teris dinı aǵymdardyń kúmándi ıdeıalaryna jaýap berip, ony joqqa shyǵarý. Bul eki ádis radıkaldy sektalardyń jeteginde ketken adamdardy ońaltýdyń negizgi ádisteri. Osy rette atalǵan saladaǵy dintanýshy mamandar jáne de sarapshylarmen teorııalyq negizde birshama jumystar atqarý kerek dep sanaımyn, – dedi A.Sabdın
Onyń aıtýynsha álem elderi úshin ekstremızm qaýpi tolyqtaı seıile qoıǵan joq. Tipti kóptegen elderde terrorlyq qaýip-qaterler kún sanap artyp keledi.
– Ýaqyt ótken saıyn dinı ekstremızm keńinen qanat jaıýda. Oǵan dálel, jat aǵymdy nasıhattaýshy uıymdar men toptardyń óz aýmaqtary, resýrstary qalyptasqan. Olar óz maqsattaryna jetý úshin zamanaýı tehnologııalar men áleýmettik jelilerdi qoldanady. Ideologııalaryn nasıhattaıtyn ádistemelerin jetildirip, qysym jasaýǵa shaqyrady. Bul rette saıasatkerler men zertteýshiler lańkestikke qarsy soǵys tek ýaqyt uzartqanyn, onyń paıdasyna qaraǵanda zııany kóbirek bolǵandyǵyn moıyndady. Osy oraıda ekstremıster men dinı radıkaldarǵa arnalǵan deradıkaldaný jáne áleýmettik ońaltý baǵdarlamasy qolǵa alynýda. Onyń álem deńgeıinde nátıjesi de joq emes, ̶ dedi sarapshy.
Búginde dinniń qoǵam aldyndaǵy, ómirdegi rólin belgilep, naqtylaý aıtarlyqtaı mańyzǵa ıe bolyp otyr. Bul jóninde Almaty oblysy Alakól aýdany ishki saıasat bóliminiń basshysy M.Súleımenov: «Básekege bás tigip, Qazaqstannyń kemel keleshegi men baıandy bolashaǵyn qalyptastyrýda Elbasynyń Jarlyǵymen bekitilgen, asa mańyzdy strategııalyq qujat sanalatyn «Qazaqstan Respýblıkasynyń din salasyndaǵy memlekettik saıasatynyń 2017-2020 jyldarǵa arnalǵan tujyrymdamasy» atalǵan salanyń damýyna temirqazyq bolmaq. Bul qujat azamattardyń quqyqtyq ar-ojdan bostandyǵyn qamtamasyz etip, elimizde tirkelgen dinı birlestikterdiń alańsyz jumys isteýi úshin qolaıly jaǵdaı jasaýda. Sondaı-aq memleket pen din arasyndaǵy júıeni qalyptastyryp, qarym-qatynastar men kózqarastardy aıqyndaıdy», degen oıyn bildirdi.
Jıynǵa qatysqan meshit ımamdary jáne din isteri bóliminiń mamandary dinı saýattylyqty arttyrýǵa baǵyttalǵan osyndaı sharalardyń bereri mol ekenin atap kórsetti.
Eki kúndik semınar barysynda aqparattyq-túsindirý toby qyzmetiniń túıtkildi máseleleri boıynsha pikir almasýlar ótti. О́zekti máseleler anyqtaldy. Shara sońynda din isteri jáne azamattyq qoǵam mınıstrligi atynan óńirlik din isteri basqarmalarynyń belsendi múshelerine alǵys hattar tabys etildi.
Joldybaı BAZAR, «Egemen Qazaqstan»