Bıyl Qazaqstanda bes adam «denge» bezgegin juqtyrsa, úsheýi Qyzyljar óńiriniń turǵyndary bolyp shyqqan. Bul týraly oblystyq qoǵamdyq densaýlyq saqtaý departamentinde ótken brıfıngte aıtyldy.
Asa qaýipti juqpaly aýrýlar epıdemıologııalyq qadaǵalaý bóliminiń jetekshisi Tolqyn Qajenovanyń sózine qaraǵanda, sońǵy jaǵdaı qazan aıynda tirkelgen. Taılandta dem alǵan 30-40 jas aralyǵyndaǵy erli-zaıyptylar men Vetnamǵa saparlaǵan er adam bezgek aýrýyna shaldyqqan. Olar elge oralǵannan keıin ózderin jaısyz sezine bastaǵan. Dene qyzýynyń kóterilýi, bas aınalý, loqsý, tábettiń azaıýy sekildi tumaýǵa uqsas belgiler bilingen soń dárigerlerge qaralýǵa májbúr bolǵan. Medısınalyq tekserýler qorytyndysy boıynsha «denge» bezgegi degen dıagnoz qoıylǵan.
Qazir naýqastardyń jaǵdaıy jaqsy. Jan-jaqty em-dom sharalary kórsetildi. Qozdyrǵysh tropıkalyq aımaqtarda ǵana kezdesetin masalar arqyly juqqan. Saqtanbaýdyń sońy osyndaı oqys oqıǵalarǵa soqtyryp jatady. Sondyqtan shetelderge shyqqanda aldyn ala qam-qareket jasaǵan jón, deıdi mamandar.
Jyl saıyn «denge» bezgegine 50 mıllıondaı adam shaldyǵyp, 20 myńǵa jýyǵy ómirmen qoshtasady eken. Bul dert Taıland, Qytaı, Indonezııa, Malaızııa, Japonııa, Kosta-Rıka, taǵy basqa elderge keń taralǵan.
О́mir ESQALI, «Egemen Qazaqstan»
Soltústik Qazaqstan oblysy