Áýlıekól aýdandyq mýzeıinde taǵylymdy shara ótti. Aǵaıyndy Serik jáne Rımma Bekturǵanovtar Áýlıekól aýdandyq mýzeıine Ahmet Baıtursynov pen onyń jary Bádrısafanyń sýreti salynǵan kartınany tabys etti.
Ony Bekturǵanovtardyń suranysymen qostanaılyq sýretshi Iýrıı Novoselov saldy. Serik Bekturǵanov – senator, al onyń apasy Rımma Bekturǵanova pedagogıka ǵylymdarynyń doktory, bilim salasynda qyzmet isteıdi. Kóp jyl Qostaanı pedagogıka kolledjin basqardy, odan keıngi jyldary «Nur Otan» partııasynyń oblystyq fılıalyna jetekshilik etti. Oblysta «Bádrısafa» tarıhı-taǵylymdyq ekspedısııasyn qurǵan da ózi bolatyn. Osy kartınany salýǵa sýretshige suranys berip, ony satyp aldy. Serik Shyńǵysuly ekeýi Áýlıekól mýzeıine syılaýǵa sheshim jaasapty.
Portrettiń tusaýkeseri Alash qozǵalysynyń 100 jyldyǵy men Áýlıekól aýdanynyń qurylǵanyna 90 jyl tolýyna arnaldy. Sharaǵa «Nur Otan» pratııasynyń músheleri, mádenıet qyzmetkerleri, zııaly qaýym ókilderiqatysty.
«Áýlıekól Ahań men Bádrısafa sheshemizdiń jastyǵynyń kýási bolǵan jer. Kartınada Ahań men Bádrısafa beıneleri jaqsy kórsetilipti. Bul jas urpaq úshin kerek taǵylym. Serik pen Rımma Bekturǵanovtarǵa rahmet aıtamyz» dedi eńbek ardageri, «Bádrısafa» ekspedısııasynyń múshesi Ibragım Aǵytaı. Aýdan ákimi Jansultan Táýkenov aýdandyq mýzeıge tapsyrǵan kartına úshin Bekturǵanovtarǵa rahmet aıtty.
«Bádrısafa sheshemizdiń dekabrıster áıelderinen eshqandaı kemisi joq. Ol Ahańa aıaǵyna deıin adal boldy, ol úshin otqa da tústi, shoqqa da kúıdi. Taǵdyrdyń salǵanyna qasqıyp qarsy turdy, bárine de kóndi. Ult ustazy Ahmet Baıtursynovtyń shyǵarmalarymen, qaıratkerligimen qatar, onyń taǵdyryn da jas urpaq bilip ósýi tıis. Ahań men Bádrısafanyń mahabbaty, olar bastan keshken beınettiń ózi jas býynǵa rýhanı azyq beredi» dedi Jansultan Qońyrtaıuly.
Tusaýkeserden keıin oblystyq orys drama teatrynyń ujymy Ahań men Bádrısafa taǵdyryn kórsetetin «Aq kelin» spektaklin qoıdy.
Názıra Járimbet
«Egemen Qazaqstan»
Qostanaı