Alǵashqy altyn

Senbi kúni Fransııa astanasy Parıjde aýyr atletıkadan álem chempıonatynyń jalaýy jelbiredi. Bul báseke bizdiń el úshin jaǵymdy jańalyqpen bastaldy. Jarystyń bastalýyna eki táýlik qalǵanda ótken Halyqaralyq aýyr atletıka federasııasynyń kezekti kongresinde elimiz 2014 jylǵy álem chempıonatyn qabyldaıtyn el bolyp sheshildi. Sol jıynda AQSh, Reseı, Túrkııa, Taıland, Polsha Qazaqstan, taǵy basqa elder álem chempıonatyn qabyldap, ony asa joǵary deńgeıde ótkizýge múmkindikteri jetetindikterin málimdegen edi. Kongreske qatysyp, kóp­shilik aldynda sóz sóılegen respýblıkalyq aýyr atletıka federasııasynyń prezıdenti Qaırat Turlyhanov: «Qazaq­stan jaǵy qandaı mańyzdy sharalardy qolǵa alsa da, ony dúrkiretip turyp ótkize alady. Ol úshin elimizde qolaıly jaǵ­daıdyń barlyǵy jasalǵan. Elimizde sportty damytýda kóp­te­gen aýqymdy sharalar men irgeli ister atqarylýda. Eń bastysy, bul sala Memleket basshysy Nursultan Nazarbaevtyń tikeleı nazarynda. Osydan birer jyl buryn Elbasynyń Ja­r­ly­ǵymen qurylǵan «Samuryq-Qa­zyna» ulttyq ál-aýqaty qory bul kúnderi sportshylar qaýy­myna barynsha qoldaý kór­setýi joǵaryda aıtylǵan sózi­mizdiń aıqyn dáleli. Mine, mem­leket tarapynan kórse­ti­lip jatqan osyndaı qamqor­lyq­tyń arqasynda otandas­ta­rymyz halyqaralyq arenada orasan zor nátıje kórsetip júr», – dedi. Basqa úmitker elderdiń ókilderi de málimdemeler jasap, ózderiniń ózgelerden ar­tyq­shylyqtaryn kórsetýge ty­rysty. Kongress bary­synda aıtylǵan barlyq ýájge qulaq asqan Halyqaralyq aýyr atletıka federasııasy músheleriniń tańdaýy aqyry Qazaqstanǵa tústi. Bul sheshimdi barlyq delegattar qoldap, 2014 jylǵy álem chem­pıo­natyn bizdiń eldiń asa joǵary deńgeıde ótkizetinimizge senimdilik bildirdi. – Bizdiń búıregimiz Qazaqstanǵa beker buryp otyrǵan joq. Birinshiden, atalǵan eldiń sońǵy tórt-bes jyl sheńberindegi tolaǵaı tabysy tańdandyrmaı qoımaıdy. Ekinshiden, olar qandaı da básekeni joǵary deńgeıde uıymdastyra biledi. Buǵan deıin qazaqstandyqtar eki ret eresekter arasyndaǵy Azııa chempıonatyn ótkizgen bolatyn. Birin – 2005 jyly Almaty, ekinshisin 2009 jyly Taldyqorǵan qa­lalary qabyldady. Sary qurlyq saıypqyrandarynyń basyn qos­qan qos jarystyń dúrkirep turyp ótkenine kópshilik kýá. Úshinshiden, bul elde qyzmet babymen ózim birneshe ret issaparmen bolyp qaıt­tym. Jasyratyny joq, Qazaq­stan­da memleket tarapynan sport sa­lasyna óte jaqsy kóńil bólinedi. Aýyr atletıkaǵa degen halyqtyń yqylasy erekshe. Sporttyq ny­san­dary zaman talabyna saı. Son­dyqtan da bizder tórtkúl dúnıe teńdessizderiniń basyn qosatyn dúbirli dodany ótkizýdi Qazaq­stan­ǵa senip tapsyrdyq, – dep Halyq­aralyq aýyr atletıka federa­sııa­synyń prezıdenti Tomash Aıan óz sózin qorytyndylady. Parıjdegi jarys osyndaı ja­ǵymdy jańalyqpen bastaldy. Sóı­tip, 2014 jylǵy lısenzııalyq álem chempıonatynyń jalaýy Astana qala­synda jelbireıtin boldy. Endi jarystyń ózine keler bolsaq, onda álemniń ár túkpirinen 93 memleketten kelgen 600-deı ziltemirshiler baq synaýda. Alǵashqy kúni otandastarymyz básekege tús­ken joq. Bul saıysta Aspanasty eli­niń asyǵy alshysynan tústi. Áıel­der arasynda 48 kılo sal­maq­ta Tıan Iýan top jarsa, erler saıysynda 56 kılo salmaqta Vý Szınbıao dara shyqty. Esesine jeksenbi kúni kúlli jankúıerler qa­zaq­standyq Zúlfııa Chınshan­lo­nyń teńdessiz ónerine qulshyna qol soqty. 53 kılo salmaq dárejesi boıynsha baq synaǵan ol julqyp kóterý jattyǵýy boıynsha basty básekelesteri – túrkııalyq Aıym Dasdelen men qytaılyq Szı Chjınnan tórt kılo artyq kóterdi. Serpe kóterýde de qarqynyn esh báseńdetpegen jerlesimiz altyn­nan alqa taǵyndy. Oǵan qosa jattyǵýdyń osy túri boıynsha álemdik rekordqa ózgeris engizdi. Chınshanlonyń ná­tı­jesi – 227 (97 + 130) kılo. Túr­kııa arýy 219 (93+126) kılolyq kórsetkishpen kúmiske qol jetkizse, Qytaı qyzy qola medaldy ıelendi. Onyń nátı­jesi – 214 (93+121). Sóıtip, Parıjdegi dodada ziltemirshilerimizdiń alǵashqy qadamy sátti bolyp, bas júldeni oljaladyq. Zúlfııa Chın­shan­lonyń jeńisti joly aldaǵy kúnderi ózge de jerlesterimizge ju­ǵysty bolýyn tileıik. Dastan KENJALIN.