Jańǵyrý jolyndaǵy porty bar Kaspıı teńizinde elimizdiń kók týyn jelbiretip, sapar sheger sý kólikteriniń de qatary artyp keledi. Otandyq flot birlikterin ulǵaıtýdy kózdeıtin «Qazteńizkólikfloty» ulttyq teńiz keme qatynasy kompanııasy bul baǵytta zamanaýı qýatty býksırlerge qol jetkizýdi maqsat etip otyr.
Aqtaý portyna «Embi» jáne «Talas» atty eki býksır saltanatty jaǵdaıda kelip jetti. Uzyndyǵy 27 metrlik, eni 9 metrlik býksırler Gollandııada jasalǵan. Olar soltústik Kaspııdiń taıaz aýdandarynda jumys istep, obektiler men kemelerdi súıreý, zákirlerdi buraý jáne óńdeý, kemelerge assıstenttik qyzmet kórsetý, navıgasııalyq kómek kórsetý, sondaı-aq basqa da qosalqy keme mindetterin oryndaıdy.
Bul býksırlerge tán erekshelikterdiń biri – jumys júrgizý aımaǵynda tereńdigi shekteýli jaǵdaıda qýattylyǵyna qatysty joǵary talaptardyń qoıylýy jáne keme ólshemderiniń shaǵyn bolýy. Kemeler «Qazteńizkólikfloty» ulttyq teńiz keme qatynasy kompanııasy» JShS-niń, «Damen» keme qurylysy kompanııasy jáne Al Hilal Islam banki arasynda jasalǵan úsh býksırdiń qurylysyn qarjylandyrý týraly shartqa sáıkes iske asyrylýda. Úshinshi býksırdiń qurylysy 2018 jyly aıaqtalady dep kútiledi.
Bas keńsesi Nıderlandta, Gorınhem qalasynda ornalasqan «DAMEN Shipyards Group» halyqaralyq keme qurylysy toby 40-qa jýyq keme qurylysy jáne keme jóndeý óndiristerin biriktirip otyr. Búginge deıin búkil álem boıynsha 6 myńnan astam keme jasalǵan, jyl saıyn 160-qa jýyq jańa kemeni paıdalanýǵa beretin kompanııada qazirgi tańda álem boıynsha 9 myń adam eńbek etýde.
«DAMEN» býksırlerdi, katerlerdi, patrýldik, joǵary jyldamdyqty jáne júk kemelerin, teńiz platformalaryna qyzmet kórsetýge arnalǵan kemelerdi, munaıdyń apattyq tógilýin joıýǵa arnalǵan kemelerdi, fregattar men iri ıahtalardy jobalaýmen jáne olardyń qurylysyn júrgizýmen aınalysady.
– «Qazteńizkólikfloty» jańa kemelerdiń qurylysyn júzege asyrý arqyly damý strategııasyn júıeli túrde jáne kezeń-kezeńmen iske asyrady, al bul Kaspıı teńiziniń qazaqstandyq sektoryn ıgerý boıynsha jobalar sheńberinde kompanııa usynatyn qyzmetter aıasyn keńeıte túsedi», dedi saltanatty rásimde «QTKF» JShS bas dırektory Marat Ormanov.
Jobany qarjylandyrýshy Al Hilal Islam banki 7 jyldan astam ýaqyt boıy Qazaqstannyń ekonomıkasyna qarjy quıyp, korporatıvtik klıenttermen jáne ulttyq kompanııalarmen tabysty jumys júrgizip keledi. «Bankimiz túrli salalardaǵy, onyń ishinde munaı-gaz sektoryndaǵy jobalardy qarjylandyrady.
«Qazteńizkólikfloty» JShS úshin býksır kemeleriniń qurylysyn qarjylandyrý Kaspıı qaırańyndaǵy ken oryndaryna qoldaý kórsetý, jalpy óńirdiń damýy úshin eń mańyzdy jobalardyń biri sanalady», deıdi bul týraly Al Hilal Islam banki AQ basqarma tóraǵasy Gordon Haskıns. Kók týdy saltanatpen kóterip, kók teńizge bet qoıǵan kemeler kóp úmitterdi arqalap bara jatty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
Sýretterdi túsirgen
Serik MAIEMEROV