Mahabbat qudireti

Elordadaǵy «Arsenal 3D» kınoteatrynda Sháken Aımanov atyndaǵy «Qazaqfılm» AQ pen «Kentavr Prodakshn» JShS birlese shyǵarǵan rejısser Talǵat Temenovtiń «Meniń kúnáli perishtem» fılminiń tusaýkeseri ótti. Fılmniń negizgi ıdeıasy – mahabbatqa adaldyq pen ar taza­lyǵyna úndeý. Qazirgi kúnniń ashy shyndyǵy onda kópshilikke túsinikti uǵymmen baıandalady. Teatr jáne kıno áleminde óziniń biregeı týyndylarymen halyq­tyń súıispenshiligine bólengen Talǵat Temenov munda da ózin tolǵantar basty máseleni al­dyńǵy orynǵa shyǵarǵan. Bul – mahabbattyń aldynda jas ta, jasamys ta dármensiz, onyń ústi­nen eshnárse ústemdik quryp kete almaıdy degen oı. Bolmasa Ashat Babaevıch (Murat Ahmanov) sııaqty sulýlyq pen kirshiksiz sezimdi dúnıeniń kúshimen ýysymnan shyǵarmaı ustaımyn deýshiler myna qoǵamda jetip artylady. Eger ómir sondaılar­dyń ólshep-pishken syzyǵymen órbıtin bolsa, onda adamı qun­dylyqtar áldeqashan jer betinen joıylyp ketpeı me? Basty keıipkerdiń aty-jóni jaıdan-jaı Aısha Abroeva (Quralaı Anarbekova) dep atalmasa ke­rek-ti. Osynyń astarynda úlken mán jatqandaı. Abroeva arqyly qazaqtyń talaı qarakóz qyzdary­nyń abyroıy pash etiledi. Dúnıe-baılyq úshin óz taǵdyrlaryn taptat­qan mundaı beıbaqtar az ba? Qyz taǵdyry – qazirgi basty máseleniń biri. Arýlaryn aıaqasty etken qoǵamnyń sol qara daǵyn beıneleýde Talǵat rejısser ózi­niń osy týyndysy arqyly kórer­menge kóp oı tastaıdy. О́mirde óz kemshiligin túzeımin degen adamǵa eshqashan kesh emes eken. Ideıa avtory keıipkerin teris joldan tegis jolǵa shyǵarady. Azamat (Danııar Qanatqalıev) esimdi jigitti kezdestirgenge deıin Aısha qaltaly qoldaýshysynyń yqpa­ly­nan shyǵa almaı, aıtqanyna kónip, aıdaýyna júrip kelse, eki jastyń bir-birine degen kirshiksiz mahabbaty keıingi ómirlerin óz­gertip jiberedi. Baılyqtyń al­dyn­da Azamat basyn ımeıdi, súıiktisin aqshaǵa aıyrbastap ketpeıdi. Joq-jitik pen tapshy­lyq­tyń zardabyn shekken boıjet­kenniń ónerdegi jolynyń sátti órilýine, armanyna qol jetkizýine septigi tıgen jebeýshisi, asa dáýletti bankırdi de jeme-jemge kelgende keshire biledi. Onyń qolymen tosynnan atylǵan oqqa tek óziniń kináli ekenin aıtady. Rejısser eshkimge kiná artpaıdy, kináli jandy izdemeıdi. Fılm eki jastyń qosylǵan baqytty shaǵymen túıindeledi. Sheshýshi mezette Aısha Parıjge shaqyrý qaǵazyn alyp, sheteldik áriptes­terinen tájirıbe almasýǵa atta­nyp ketedi. Biraq ómirde adamǵa bir ǵana márte buıyratyn móldir sezimnen qymbat eshteńe joq ekenin túsinip, elge qaıta ora­lady. Otanǵa oralý máselesi de qazirgi jastar ómirindegi kúrde­li problemanyń biri desek, ásirese shet elge bilim qýyp ketip jatqan jastardyń týǵan jerge bári oralyp jatyr ma degen suraqtyń týýy zańdy. Aısha da sondaı jastarymyzdyń biri. Osy taqyryp tereńdep bolmasa da, birshama deńgeıde kóterilýi keıingi týyndylarǵa sabaq bolar degen oıdamyz. Taǵy bir ereksheligi – fılm­ge fransýzdyń ataqty akteri Jerar Depardeniń túsýi. Re­jıs­serdiń aıtýyna qaraǵanda, ol óziniń meıramhanasyn usy­nyp, fılmniń túsirilýine kóp qoldaý kórsetipti. Sonymen birge, óz akterlerimizden medınstı­týttyń professory rólindegi Asylbolat Ysmaǵulov, Aısha­nyń anasynyń beınesin somda­ǵan Maıra Omarova oıyndaryn atap ótken jón bolar. Fılmniń aty aıtyp tur­ǵandaı,  «ózi kúnáli bolsa, ol qa­laı perishte bolady?» degen su­raq­tyń qoıylýy da múmkin. Jer betindegi adam balasynyń bári kúnáhár pende. Ol týraly oıdy tolǵaı tússek, bir ǵana fılm tóńiregindegi áńgime azdyq eteri sózsiz. Rejısserdiń maqsaty, jas­tarǵa oı salý shyǵar dep topshyladyq. Bir adamdy oıǵa batyra alǵan kórsetilim joly bolǵan dúnıe dep esepteledi. Mine, osy turǵydan kelgende, jurt muny qyzyǵa tamashalaı­tyny daýsyz. Qarashash TOQSANBAI. ______________________ Sýretti túsirgen Sovetbek Maǵzumov.