Almaty oblysynyń Qarasaı aýdanyndaǵy Shamalǵan aýylynda Qazaqstan respýblıkasynyń Tuńǵysh Prezıdenti – Ult Kóshbasshysynyń «Atameken» tarıhı-mádenı ortalyǵy ashyldy.
Shamalǵan – Elbasynyń kindik qany tamǵan aýyl. Álem nazaryndaǵy Qazaqstannyń Tuńǵysh Prezıdenti Úshqońyr taýynyń etegindegi osy bir etek-jeńi jınaqy eldi mekennen túlep ushqan edi. Bul aýylda Memleket basshysynyń taǵylymdy ómir jolyn óskeleń urpaqqa pash etetin tarıhı-ólketaný murajaıy 1998 jyldan beri kelýshilerge qyzmet etip keledi. Al Tuńǵysh Prezıdent kúni merekesine oraı esigin aıqara ashqan «Atameken» tarıhı-mádenı ortalyǵy shamalǵandyqtar ǵana emes, tutas elimizdiń maqtanyshyna aınalatyn rýhanı keshenge aınalmaq.
Ortalyqtyń ashylý saltanatyna Qazaqstan Respýblıkasy Prezıdenti Keńsesiniń basshysy Mahmud Qasymbekov qatysyp, quttyqtaý sóz sóıledi.
– Biz búgin tarıhı máni bar úlken oqıǵaǵa kýá bolyp otyrmyz. Bul kún barlyq qazaqstandyqtar úshin eleýli kún, óıtkeni Elbasy Nursultan Ábishuly Nazarbaev – qarqyndy áleýmettik-ekonomıkalyq jáne saıası damýy bar memlekettiń biregeı úlgisin jasaǵan zamanymyzdyń tanymal memlekettik jáne saıası qaıratkeri. Elbasy sekildi tarıhı tulǵa - bizdiń jastarymyz teńelýge tyrysyp, ózderi úshin durys baǵdar belgileýiniń, elikteýiniń aıshyqty úlgisi, al onyń ıdeıalary men eńbeginiń jemisi halyq ıgiligine aınalýǵa tıis, - dedi óz sózinde Mahmut Bazarqululy.
Endi Elbasynyń ómir joly men qyzmetinen taǵylymdy syr shertetin kitaptar men eksponattardy osy «Atameken» tarıhı-mádenı ortalyǵynan tamashalaýǵa bolady. Qundy jádigerlerdi jınaqtaýǵa Shamalǵandaǵy tarıhı ólketaný murajaıy, orta mekteptiń ujymy jumylsa, Memleket Basshysynyń jazba eńbekteri men tanymdyq fotosýretteri, ár jyldarda jaryq kórgen kitaptary Elbasy kitaphanasy men Ulttyq kitaphana muraǵatyna alynǵan eken. Al ortalyqtyń ashylýyna oraı QR Tuńǵysh Prezıdenti Qory ortalyqtyń ekponattar qoryna Memleket basshysy paıdalanǵan úkimettik avtokólik tapsyrdy.
Bul ortalyq Almaty oblysynyń ákimdigi jáne QR Tuńǵysh Prezıdenti - Elbasy qorynyń qoldaýymen ashylyp otyr. Saltanaty shara barysynda jınalǵandardy oblys ákimi Amandyq Batalov quttyqtap, «Ortalyqtyń altyn qoryna jınalǵan barlyq eksponattar Elbasynyń balalyq shaǵynan egemen eldiń Kóshbasshysyna aınalǵanǵa osy kúnderge deıingi júrip ótken sara jolynan syr shertedi. Meniń oıymsha, bul ortalyqtyń óskeleń urpaqty otansúıgishtikke tárbıeleýde olardyń sanasyn jańǵyrtýda ózindik eleýli úlesi bolary sózsiz. Endi barsha qazaqstandyqtardyń tarapynan sózsiz moıyndalǵan Ult Kóshbasshysymen jaqyndastyratyn ortalyqqa aınalaryna senimdimin» dedi.
Aıtpaqshy, «Atameken» tarıhı-mádenı ortalyǵy jergilikti turǵyndardyń bastamasymen qolǵa alynyp, óńir azamattarynyń demeýshiligimen salyndy. Osy sharada oblys ákimi ǵımarttyń ashylýyna muryndyq bolǵan barsha azamattarǵa Qurmet gramotalary men Alǵys hat tabystady.
Sondaı-aq, ǵımarattyń saltanatty túrde lentasyn qııý rásimine mártebeli meımandarmen birge Bolat Nazarbaev ta qatysty. Al aýdandaǵy Ýshınskıı atyndaǵy orta mekteptiń oqýshysy Darhan Shafhatov jyrdan shashý shashty.
Al esigin aıqara ashqan ortalyqtyń keleshek urpaq úshin tarıhı mán-mańyzyna toqtalǵan Qazaqstan Respýblıkasynyń Tuńǵysh Prezıdenti – Elbasy Qorynyń atqarýshy dırektory Qanat Jumabaev: «Elbasynyń týǵan jerinde boı kótergen ortalyqtyń maqsaty Mereleket basshysynyń shyǵarmashylyq jáne saıası jolyn keńinen nasıhattaý, sondaı-aq Prezıdenttiń ómiri men qyzmetiniń aıshyqty úlgileri negizinde jastardyń patrıottyq tárbıesin kúsheıtý» deıdi.
Qalmahanbet MUQAMETQALI,
«Egemen Qazaqstan»
ALMATY