Atyraý munaı jəne gaz ýnıversıtetiniń jańa stýdenttik qalashyǵyn salýǵa 200 gektar jer bólinedi,- dep habarlaıdy Atyraý oblystyq óńirlik kommýnıkasııalar qyzmeti.
Bul týraly búgin ýnıversıtettiń qamqorshylar keńesi məjilisinde aıtyldy. Jańa nysan qurylysyna jer bólý məselesi oblystyq əkimdikte qaralyp jatyr.
Stýdentter qalashyǵy sporttyq, oqý-tehnologııalyq, zertteý zerthanalarynan, turǵyn jaılardan turady. Kampýsta stýdentter kúni boıy oqyp, təjirıbe jınaqtaýǵa qajet jaǵdaıdyń bəri jasalady. Stýdentterge qyzmet kórsetý ortalyǵy salynady, ol bir tereze qaǵıdasy boıynsha jastarǵa qyzmet túrlerin usynady.
Aıta keteıik, qazir Atyraý munaı jəne gaz ýnıversıtetine ataý berý rəsimi júrip jatyr. Jańa ataqqa saı bolý úshin oqý ornynyń rektoraty oqý korpýstaryn jańartyp, zaman talabyna saı jabdyqtarmen qamtyp, ǵımarattar salýdy qolǵa alǵan.
- Biz oqý ornymyzdyń bilimi reseılik Gýbkın atyndaǵy ýnıversıtetten kem bolmaǵanyn qalaımyz. Osy maqsatta eńbektenip jatyrmyz. Jańa stýdenttik qalashyq munaı-gaz salasyndaǵy otandyq mamandardy daıyndaý, oqytý isinde sapany arttyrady degen oıdamyz,-deıdi ýnıversıtet rektory Əlı Əbishev.
JOO qamqorshylyq keńesiniń tóraǵasy oblys əkimi Nurlan Noǵaev stýdenttik qalashyq salý ıdeıasyn qoldaıtynyn aıtyp, jer bólý jaıy qaralyp jatqanynan habardar etti. Atyraý munaı jəne gaz ýnıversıtetinde stýdenttik qalashyq qurylysy aldaǵy jyly bastalady dep josparlanýda. Aldyn ala aqparat boıynsha, qalashyq Mahambet aýdanynyń aýmaǵynda boı kóteretin bolady.
Baqytgúl BABASh, "Egemen Qazaqstan"