Qyrǵyzstan Qazaqstanǵa baılanysty Eýrazııalyq ekonomıkalyq komıssııa men Dúnıejúzilik saýda uıymyna bergen aryzyn qaıtyp alady. Bul týraly Qyrǵyz Respýblıkasynyń vıse-premeri Tolqynbek Abdyǵulov málimdedi.
Ol qazaq-qyrǵyz shekarasynda Qazaqstannyń kúsheıtilgen rejimdi engizýine baılanysty Qyrǵyzstan tarapy osyndaı qadamǵa barǵanyn aıtty.
Abdyǵulov óz sózinde eki tarap shekaradaǵy jaǵdaıdy retteý týraly ortaq kelisimge kelgenin, sondaı-aq «Jol kartasy» jobasyna qol qoıǵanyn jetkizdi.
«Qazaqstan men Qyrǵyzstan arasyndaǵy «Jol kartasy» 50 tarmaqtan turady. Onda shekara, kólik, fıtosanıtarlyq jáne veterınarlyq baqylaý, keden jáne salyq basqarmalary salasyndaǵy yntymaqtastyq týraly máseleler qarastyrylǵan. Veterınarııa jáne karantın salasyndaǵy tarmaqtardyń basym bóliginde qyrǵyz tarapy Qazaqstan arqyly ótetin taýarlardy veterınarııalyq-sanıtarııalyq baqylaýda turaqty ári tıimdi ustaýdy qamtamasyz etýi qajettigi kórsetilgen. Budan bólek, «jol kartasynda» Qazaqstandaǵy veterınarııalyq-sanıtarııalyq baqylaýǵa jatatyn ónimderdi jetkizýge quqyǵy bar kásiporyndar tizbesin keńeıtý sııaqty máseleler qarastyrylǵan», – dedi Qyrǵyz Respýblıkasynyń vıse-premeri.
Osyǵan deıin habarlanǵandaı Qazaqstan tarapy shekaradaǵy kúsheıtilgen rejimdegi baqylaýdy 3 jeltoqsannan bastap toqtatty. Bul 2 jeltoqsan kúni Astanada Qazaqstan vıse-premeri Asqar Mamın men Qyryzstan vıse-premeri Tolqýnbek Abdygýlov arasynda qol qoıylǵan «Jol kartasynda» ekijaqty ekonomıkalyq yntymaqtastyq máselesinde qarastyrylǵan. Qujatqa Memleket basshysy Nursultan Nazarbaevtyń tapsyrmasy boıynsha qol qoıyldy.
Aıta keteıik, 10 qarasha kúni Qyrǵyzstan Dúnıejúzi saýda uıymynda Qazaqstan tarapyn «shekarany negizsiz jaýyp tastady» dep aıyptap, shaǵym túsirgen bolatyn.