El gazeti – «Egemenniń» respýblıka boıynsha taralymy 200 myńnyń ústinde der bolsaq sonyń 20 danasy osy aýylda taraıdy. Aýyldyń aty – general Táttibaı Dúısebaıuly.
Poshta tasýshysy – Qurmanbek Raıymbek. Onyń qujattaǵy esimi Qurmanbek bolǵanymen, kúlli aýyl úshin ol jaı Qurman. Ár adam óziniń jany súıgen isiniń, kásibiniń deıikshi, patrıoty bolyp keletini bar, Qurman sondaı jan. Jurttyń da bul jigitke degen yqylas-qurmeti bólek. Osy aýylda 15 jyldan beri oqyrmandy gazetpen, zeınetkerler men memlekettik jeńildikke ıe jandardy zeınetaqy-járdemaqymen der mezgilinde qamtamasyz etip keledi. Poshtadan alar aılyǵy – 11 myń teńge. Sómke men etik tegin.
– Alataýdyń etegindegi tabıǵaty qatal jalǵyz aýylmyz. Sómkemdi toltyryp alyp jazdyń kúni poshtany atpen tasımyn, qystyń kúni kóshede taý-taý bop úıligen qardan at óte me, ár kóshege arnap eki-úshten bólip jaıaý jetkizemin, – deıdi Qurman qysyla. – Aqsha da, gazet te merziminen bir kún keshikken emes, ıeleriniń qolyna ustata qoıamyn.
Aýylda 150 tútin bar. Qurman es bilgeli osylaı, aýyl halqynyń sany azaımaıdy da, kóbeımeıdi de. Aýdandyq «Jańa ómir» gazetine jyl saıyn 70 adam jazylady. Aýdan úni. Kemýge tıis emes. Kóp jyldan beri solaı. Oblystyq «Aq jol» – 24, «Egemen Qazaqstan» – 20 dana.
– Jýaly aýdandyq baılanys-poshta torabynyń bastyǵy Núrzııa Altybaeva degen bir «altyn» kisi bar, – deıdi aýdandaǵy 58 poshtashynyń biregeıi Qurmanbek Raıymbek. – О́z gazetterimizdiń jaıy jaman bolmas, sen mynaý respýblıkalyq «Egemen Qazaqstan» gazetin umytpa, oqyrmanyn tómendetpe,– dep otyrady.
Sonymen bul aýyldaǵy «Egemenniń» sany 20-dan esh kemigen emes. Qurmannyń sońǵy jyldar bederinde ańǵarǵany musylmandyqty dáripteıtin basylym sandarynyń molaıǵany eken. О́z basy muny jaqsylyqqa balaıdy. Taratyp júrgen onshaqty «Islam jáne órkenıet» gazeti men «Iman» jýrnaly sonyń aıǵaǵy. Aýylǵa Almatydan keletin jalǵyz dana «Prezıdent jáne halyq» gazetin zeınetker-ustaz Aıyp Qarajigitov jazdyryp alady. «Aıyp aǵamyz gazetke jazylýdan kóshbasshy. «Egemen Qazaqstannan» bastap gazet-jýrnalǵa jylyna bir ret bar zeınetaqysyn qınalmaı bóledi», deıdi Qurman.
Mektep pen kitaphana qashanda aýyldyń rýhanı-mádenı ordasy edi ǵoı! Amangeldi atyndaǵy orta mekteptiń dırektory Aıgúl Imash bastaǵan Oralhan Batyrqul, Eshenqul Qanseıit, Abzal Erejep sııaqty muǵalimder, mekteptiń ustaz-ardagerleri Qýandyq Amanbaev, Lesbaı Nazarbaev, Meıirhan Báıimbetov jáne basqalar baspasózge jazylý naýqanynda aldymen «Egemen Qazaqstannyń» atyn ataıdy degen poshtashy jigittiń sózi júrek jylytty. Aıtpaqshy, bul arada taý bókterindegi jalǵyz aýylǵa qysy-jazy bir tynbaı toqtaýsyz júretin «Nıvamen» poshta tasıtyn ınkassator alyp júrýshi Seıtqas Tásheekev pen júrgizýshi-ınspektor Bolat Rahmanqulovtyń, bar isti nazarynda nyq ustaıtyn Shaqpaq ata aýyldyq okrýgi poshta bóliminiń bastyǵy Baqytjan Usataevtyń eńbegin de atap ótpese bolmas. «Meniń el aldyndaǵy abyroıly júrýim ýaqytpen sanaspaıtyn osy marqasqa jigitterdiń arqasy», deıdi Qurman.
Eń qyzyǵy, men oǵan «Egemenniń» sanyn arttyrshy dep qolqa salmasam da «Egemen Qazaqstan» gazetiniń sany aldaǵy 2018 jyly aýylda 25 dana bolady, ýáde etemin» dep kúlimsiregen Qurmannyń sózi qulaǵymda qalyp qoıypty. Jýrnalıst-tilshi úshin baspasózge jazylý naýqany kezinde budan asqan asqaq sóz, budan artyq qurmet bar ma edi!? «Egemenniń» eldegi óz adamy bolǵany qandaı jaqsy! Qazaqstanda 7000-nyń ústinde aýyl bar eken. Shirkin, ár aýyldaǵy ár poshtashy osy Qurmanbekteı bolsaıshy!..
Talǵat SÚIINBAI, «Egemen Qazaqstan»
Jambyl oblysy, Jýaly aýdany, T.Dúısebaıuly aýyly