О́ńirlerdi kógildir otynmen qamtý máselesi árdaıym ózekti. Ásirese, oblys, aýdan ortalyǵynan shalǵaı jatqan eldi mekender úshin gaz máselesi talaı jyldan beri túıtkildi máselege aınalǵan.
Jambyl oblysynda jalpy 377 eldi meken bar. Búgingi tańda onyń 181-i taýarly gazben qamtylyp, kógildir otynnyń ıgiligin kórip otyr. Aǵymdaǵy jyly gazdandyrý jumysyn jalǵastyrý maqsatynda 7 mıllıard 726 mıllıon teńgege alty joba boıynsha qurylys-montaj jumystary júrgizilgen. Atalǵan qarajatqa T.Rysqulov aýdanyndaǵy «Aqyrtóbe» jańa gaz rettegish stansasynyń qurylysyn júrgizý, sol aýdandaǵy «Nartáýekel-2001» JShS aýmaǵynda ornalasqan «Aq bulaq» sharýa qojalyǵynyń jylyna 120 tonna bıe sútin óndiretin zaýytyn gazdandyrý, Taraz qalasynyń Shóldala turǵyn alqabyna gaz tartatyn qubyr salý, sonymen qatar Merki aýdanyndaǵy Novovoskresenovka gaz rettegish zaýytyn qaıta jańǵyrtý, T.Rysqulov aýdanyndaǵy Qulan aýylynyń «Araı» turǵyn alqabyn gazdandyrý, Talas aýdanynyń bes jáne Sarysý aýdanynyń tórt eldi mekenine gaz keltiretin qubyrdyń qurylysyn júrgizý sııaqty jumystar atqarylǵan.
– Sonymen qatar bes aýdannyń 69 eldi mekenin gazdandyrýǵa 484,3 mıllıon teńgege jobalaý-smetalyq qujattama daıyndalýda. Bul Baızaq aýdanynyń jıyrma bir aýyly, Jambyl aýdanynyń on úsh aýyly, Shý aýdanynyń on segiz aýyly, Talas aýdanynyń úsh aýyly jáne Sarysý aýdanynyń on tórt aýyly. Taraz qalasy turǵyndarynyń qaýipsizdigin qamtamasyz etý maqsatynda eki avtomattandyrylǵan gaz rettegish stansa qalanyń syrtyna shyǵarylady, – deıdi oblystyq energetıka jáne turǵyn úı-kommýnaldyq sharýashylyq basqarmasy gazdandyrý jáne ónerkásiptik qaýipsizdik bóliminiń basshysy Baqtybaı Qyryqbaev.
Basqarmanyń málimetinshe, Qordaı aýdanynda taý bókterinde ornalasqan 29 eldi mekendi jáne jazyqta ornalasqan 17 eldi mekendi kelesi jyly gazben qamtý kózdelýde. Alaıda bul oraıda «Azııalyq gaz qubyry» JShS boıymen Otar aýylynyń tusyna gaz rettegish stansa salynýy tıis eken. Sonymen qatar osy aýdandaǵy «Georgıevka» gaz rettegish stansasyn qaıta jaraqtandyrý qajet. Eger berilgen bıýdjettik ótinimge saı oblys ákimdiginen tıisti qarajat bólinse, kelesi jyly Qordaı aýdanynyń 46 eldi mekeni kógildir otynmen qamtylady.
Búgingi tańda oblystyń Moıynqum jáne Sarysý aýdandary múlde gazben qamtylmaǵan. Osy oraıda oblys ortalyǵynan 300 shaqyrymnan astam jerde ornalasqan Moıynqum aýdanyndaǵy 9 aýylǵa kelesi jyly gaz tartý maqsatynda «Azııalyq gaz qubyry» boıynan gaz rettegish stansasyn salý qajettigi týyndap tur. Bul másele de berilgen bıýdjettik ótinimge baılanysty bolmaq. Sonymen qatar Tamdy eldi mekeniniń janynan gaz rettegish stansa salý qajettigi Bılikól aýmaǵynda ornalasqan 9 eldi mekendi gazben qamtý máselesi de týyndaıdy. Bul aýmaqta Jýaly aýdanynyń – 4, Talas aýdanynyń – 2 jáne Jambyl aýdanynyń 3 eldi mekeni bar.
Búginde Áýlıeata óńirindegi «Amangeldi Gaz» kásipornynda óndiriletin kógildir otynnyń 80 paıyzy oblystyń úlesinde. Eger oblys ákimdigi tarapynan basqarmanyń bergen bıýdjettik ótinimi maquldansa, onda kelesi jyly jambyldyqtardyń birazy kógildir otynnyń ıgiligin kórmek. Oblystyń 48 paıyzyn taýarly gazben qamtyǵan óńir kelesi jyly da qapy qalmaýdyń áreketin jasaıdy degen turǵyndardyń senimi bar.
Hamıt ESAMAN,
«Egemen Qazaqstan»
Jambyl oblysy