Bıyl Qostanaıda on ekinshi ret úzdik jastardyń esimi «Qostanaı oblysy jastarynyń Altyn kitabyna» tirkeldi.
Olardyń barlyǵy da jastyǵyna qaramaı, ómirdiń ár salasynda úzdik jetistikke jetkender bolatyn. Mysaly, Qadyrjan Maqanǵalıdyń ózi jas ǵalym. Ol taıaý ýaqytta oblys ortalyǵynan shalǵaıda jatqan Qamysty aýdanynda halyqaralyq dárejede atalyp ótken ınnovasııalyq tehnologııamen óńdeletin shujyq sehyn ashýdy josparlap otyr. Al Dmıtrıı Romashenko memlekettik tildi taza meńgerip alýymen qatar, Fedorov aýdanyndaǵy №1 orta mektepte qazaq tilinen ozyq ádistememen sabaq beredi. Bıyl «Altyn kitapqa» esimderi jazylǵan 11 jastyń árqaısysy óziniń isimen, darynymen qyzyqty dastan sekildi.
– Meniń bala jasymnan memlekettik tilge qyzyǵýshylyǵym bolatyn. Biraq A.Baıtursynov atyndaǵy Qostanaı memlekettik ýnıversıtetiniń qazaq fılologııasy mamandyǵyna túskenimde tilim qazaqshaǵa onsha kelmeıtin jáne kóp sózderdi túsinbeıtinmin. Birinshi kýrsta bir sóz de aıtqan joqpyn, tapsyrmany únsiz oryndaýmen boldym. Ekinshi kýrsta bir-eki aýyz sóz sóıleıtin boldym, úshinshi kýrsta odan da jaqsy, tezirek sóıledim, tórtinshi kýrsta sóılep kettim. Men memlekettik tildi bilýim kerek degen maqsat boldy mende, sonymen qatar ózim týǵan Fedorov aýdanynan eshqaıda shyqpaımyn degen oıym boldy. Al aýylda memlekettik tilde sabaq berý meniń ómirlik nanym dep bildim, – deıdi Dıma aǵynan jarylyp. Qazir onyń qazaq tilin meńgerý jáne úıretý jónindegi izdenisteri til mamandarynyń nazaryn aýdaryp júr.
Jyl da dástúrli ótetin «Qostanaı oblysy jastarynyń altyn kitaby» balyna bıyl da oblys ákimi Arhımed Muhambetov qatysty.
«Elbasy Nursultan Nazarbaev jastar isine ylǵı da kóńil bólip otyrady. Onyń «Bolashaqqa baǵdar: rýhanı jańǵyrý» atty maqalasyndaǵy aıtylǵan máselelerdiń barlyǵy da jastarǵa arnalady, sondyqtan ony júzege asratynyn da sizder bolasyzdar. Eńbeksiz, maqsatsyz eshkim de memleketke, otbasyna paıdaly is isteı almaıdy. Bizdiń bul shara jyl saıyn el bolashaǵynyń kókjıegindeı arman qýǵan talantty, daryndy jastardyń ósip kele jatqanyna kepil bolady. Búgingi marapat, qurmet sizderdiń eńbekterińizdi moıyndaý ǵana emes, qoǵamnyń sizderge kórsetken úlken senimi. О́zge jastar sizderge teńelgisi keledi», dedi Arhımed Muhambetov.
Qostanaıda 184 jastyń esimi «Qostanaı oblysy jastarynyń altyn kitabyna» jazyldy. Jalpy Qostanaı oblysynda memlekettik jastar saıasatyn qarjylyq qoldaý da jyl saıyn ósip keledi. Bıyl bıýdjetten osy maqsatqa 190 mıllıon teńge bólindi.
Jastarǵa arnalǵan bıylǵy bal qaıyrymdylyq aksııasymen aıaqtaldy. «Alaqandaǵy ómir» jobasy aıasynda 9 jasar Konovalchýk Iraǵa operasııa jasaýǵa kerek 5 mıllıon teńge qarjyny jınaý júrip jatyr. Keshte oǵan arnalǵan qaıyrymdylyq jáshigine 50 myń teńge jınaldy.
Názıra Járimbet,
«Egemen Qazaqstan».
Qostanaı