Búgin Qyzylorda oblysynyń ákimi Murat Ergeshbaev, «AMANAT» partııasynyń hatshysy Erjan Jylqybaev, Parlament Májilisiniń depýtaty Marhabat Jaıymbetov jáne О́nerkásip jáne qurylys mınıstrligi mamandarynyń qatysýymen «TURǴYNDAR AMANATY» partııalyq jobasy aıasynda forým ótti, dep habarlaıdy Egemen.kz.
Onda kóppáterli turǵyn úılerdi basqarý júıesin jetildirý, turǵyn úı-kommýnaldyq sharýashylyq salasyndaǵy ózekti máseleler talqylandy.
«Memleket basshysynyń tapsyrmasyna sáıkes Qyzylorda qalasynyń kópqabatty turǵyn úılerin ystyq sýmen qamtý jobasy júzege asyrylyp, búginde turǵyndar onyń ıgiligin kórýde.
Turǵyn úı qoryn jańartý turaqty baqylaýymyzda. Úsh jylda 3 mlrd. 500 mln. teńgege 65 kóppáterli turǵyn úı kúrdeli jóndeýden ótti. Qyzylorda qalasynda 1 mlrd. 775 mln. teńgege 60 eski kópqabatty turǵyn úıdiń qasbetteri zamanaýı panelmen qaptaldy, 4 mlrd. teńgege qosymsha 70 turǵyn úı jańartylýda. Aýlalarǵa demeýshiler esebinen 80 sport, oıyn alańy ornatyldy.
«Taza Qazaqstan» ekologııalyq aksııasy aıasynda eldi mekenderdi abattandyrý, qorshaǵan ortany taza ustaý, kógaldandyrý jáne ekologııalyq mádenıetti qalyptastyrýda aýqymdy sharalar uıymdastyrylyp keledi. Maqsat – turǵyndardyń jaıly ómir súrýine qolaıly jaǵdaı jasaý.
Forým aıasynda kóterilgen bastamalar elimizdegi jáne Syr óńirindegi turǵyn úı salasynyń damýyna oń serpin beredi dep senemin. Barshańyzǵa myqty densaýlyq, otbasylaryńyzǵa amandyq, eńbekterińizge tabys tileımin!» dedi Murat Nálqojauly.
Basqosýda Erjan Jumatuly, Marhabat Jaıymbetuly, Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Tursynbaıuly, «Qazaqstandyq turǵyn úı-kommýnaldyq sharýashylyqty jańǵyrtý men damytý ortalyǵy» AQ departament dırektory Marǵulan Jeńisuly, oblystyq energetıka jáne turǵyn úı-kommýnaldyq sharýashylyq basqarmasynyń basshysy Medet Ýsaınuly, Qyzylorda qalasynyń ákimi Nurjan Sábıtuly, Páter ıeleri assosıasııasynyń Qyzylorda qalasy boıynsha tóraıymy Ilimjaýhar Keńesqyzy sóz sóıledi.