Qyrǵyzstannyń burynǵy UQK basshysy Qamshybek Tashıevke qatysty qylmystyq is qupııa túrde sotqa joldandy, dep habarlaıdy Egemen.kz.
Advokat Ikramıdın Aıtkýlovtyń málimetinshe, 12 mamyr kúni Qyrǵyzstannyń Bas prokýratýrasy Tashıevke qatysty aıyptaý aktisin bekitken. Burynǵy sheneýnikke bılikti kúshpen basyp alýǵa daıyndaldy jáne qyzmettik ókiletin asyra paıdalandy degen aıyp taǵylyp otyr.
Is Bishkektiń Pervomaı aýdandyq sotyna qaraýǵa jiberilgen. Tashıevpen birge taǵy jeti adam aıyptalýshy retinde tirkeldi.
Qorǵaýshynyń aıtýynsha, qylmystyq is qupııalanǵan. Sondyqtan sot otyrystary jabyq formatta ótedi jáne tergeý men sot materıaldaryn jarııalaýǵa tyıym salynǵan.
Buǵan deıin 29 sáýirde Qamshybek Tashıev Qylmystyq kodekstiń eki baby boıynsha aıyptalǵany habarlanǵan edi. Alaıda ol ózine taǵylǵan aıyptardy moıyndamaı, zań aıasynda qorǵalatynyn málimdedi.
Qyrǵyzstan medıasy bul tergeýdi «75 adamnyń haty» degen oqıǵamen baılanystyryp otyr. Aqpanda 75 azamat prezıdent Sadyr Japarov pen parlament spıkeri Nurlanbek Turǵynbekulyna ashyq úndeý joldap, elde merziminen buryn prezıdent saılaýyn ótkizýdi talap etken.
Osydan keıin, 10 aqpanda Sadyr Japarov óziniń uzaq jyldar boıǵy seriktesi bolǵan Qamshybek Tashıevti qyzmetinen bosatty. Ol 2020 jyldyń qazan aıynan beri mınıstrler kabınetiniń tóraǵa orynbasary jáne UQK tóraǵasy qyzmetterin atqarǵan. Onyń ornyna komıtet basshysynyń mindetin ýaqytsha atqarýshy bolyp Jumǵalbek Shabdanbekov taǵaıyndaldy.