Taraz qalasynda 15 jastaǵy jasóspirim Audi kóligimen polısııadan qashý barysynda, jol apatyna ushyrady, dep habarlaıdy Egemen.kz Jambyl oblystyq polısııa departamentine silteme jasap.
Polısııa málimetinshe, patrýldik qyzmetkerler jol erejesin buzǵan Audi kóligin toqtatpaq bolǵan. Alaıda júrgizýshi polısııanyń zańdy talabyna baǵynbaı, qashyp ketýge tyrysqan. Ol jol qozǵalysy erejelerin óreskel buzyp, ózge júrgizýshilerge qaýip tóndirgen.
Qýǵyn kezinde júrgizýshi kólikti basqara almaı, elektr jelisiniń beton baǵanyna soǵylǵan. Jol apaty saldarynan kóliktegi bir jolaýshy qaza tapty. Taǵy eki jasóspirim jaraqat aldy.
Kólik toqtatylǵannan keıin rólde 15 jastaǵy jasóspirim otyrǵany anyqtalǵan. Onyń júrgizýshi kýáligi bolmaǵan. Jasóspirim ata-anasymen birge polısııa bólimine jetkizildi.
Qazir oqıǵanyń barlyq mán-jaıy anyqtalyp jatyr. Sondaı-aq jasóspirimniń kólikke qalaı qol jetkizgeni tekserilýde. Tergeý aıasynda kólik ıesiniń de áreketine quqyqtyq baǵa beriledi.
Polısııa ata-analar balalaryna durys baqylaý jasaýǵa mindetti ekenin eske salyp, quqyq qorǵaý organdarynyń talabyna baǵynbaý aýyr saldarǵa ákelýi múmkin ekenin aıtty.
Aıta keteıik, mamyr aıynyń basynda ShQO-da jantúrshigerlik jol apaty bolyp, úsh jas azamat oqıǵa ornynda kóz jumdy. Túrkistan oblysynda jol apatynan úsh oqýshy mert boldy. Qostanaı oblysynda da jol apaty bolyp, 4 adam qaza tapty.