Búgin Ońtústik Qazaqstan oblysynyń ákimi Janseıit Túımebaev Jańa jyl merekesimen quttyqtap, Uly Otan soǵysynyń ardageri Qarataı Tólebekov pen kópbalaly otbasylardyń shańyraqtarynda boldy, dep habarlaıdy OQO ákiminiń baspasóz qyzmeti.
О́ńir basshysy eń aldymen maıdanger Qarataı Tólebekovti merekemen quttyqtap otbasyna bardy. Eńbek ardagerine qurmet kórsetken ákim óńirdegi atqarylǵan jemisti jumystardy atap ótip, búgingi jastardyń iskerligin sóz etti.
«Búgingi jas urpaq ózińizdeı tulǵalarǵa eliktep ósýi kerek. Sol arqyly eńbekqorlyqty, batyrlyqty boıyna sińiredi. Qazynaly qarttarymyz ulaǵatty bolashaǵymyzdyń kepili. Elimizdegi barlyq ardagerlerimizdiń denderi saý, jastary uzaq bolǵaı», - dedi ákim.
Qarataı Muratbekuly 1942-1945 jaldary Kalının, II-Baltyq fronttarynda qatardaǵy jaýynger, kishi bólim komandıri, batalon komsorgi, áskerı hımık bolǵan. Otan soǵysynyń II-shi dárejeli jáne «Qurmet belgisi» ordenimen, Sondaı-aq bilim salasyndaǵy jemisti eńbekteri úshin «Bilim salasyndaǵy erekshe eńbekteri úshin» tósbelgisimen marapattalǵan.
Budan bólek, aımaq basshysy kópbalaly otbasy Seıtbekovtar shańyraǵynda bolyp, balalarǵa jańa jyldyq táttiler úlestirip, teledıdar syılady. Qýanyshqa bólengen balǵyndar oblys ákimine óz ónerlerin kórsetti. Toǵyz balanyń anasy Aınur Jaksylyqova búginde «Altyn alqa» ıegeri atanǵan.
Táýelsiz elimizdiń demografııalyq ósimine eleýli úles qosyp júrgen altyn qursaqty analarymyzdy quttyqtaǵan oblys ákimi, batyr analarǵa densaýlyq, otbasylaryna amandyq pen tatýlyq tiledi.
Aıta keteıik, búginde Ońtústik Qazaqstan oblysynda «Qazaqstan Respýblıkasyna sińirgen erekshe eńbegi úshin respýblıkalyq dárejedegi 8 derbes zeınetker, 196 Uly Otan soǵysynyń ardageri men 5543 «Altyn alqa» ıegeri turady.
Sondaı-aq, oblys ákiminiń orynbasary Erbol Sadyr 11 balany tárbıelep otyrǵan Júsipbaevtardyń otbasyna bardy. Balalardyń anasy Madına Júsipbaeva búginde «Altyn alqa» ıesi.