«Adam janynyń arashashysy» degen sóz basqany qaıdam, dál jedel járdem qyzmetine arnalyp aıtylǵandaı kórinetini bar. Kósheden kóre qalsaq, ysyrylyp jol berý mádenıetin de endi ǵana meńgerip kele jatqan sııaqtymyz. Munyń bári adam shyǵynynyń azaıýyna, naýqasqa der kezinde kómek berilýine septesetin jaıttar. Mundaǵy eń basty qajettilik tehnıka tóńireginde bolatyny anyq. Sondyqtan medısınalyq jedel járdem kóliginiń kóptigi, árıne, jaqsy. Merekeler qarsańynda Almaty oblysynda medısına qyzmetkerlerine zamanaýı jabdyqtarmen jasanǵan osyndaı 51 jańa kólik tabys etildi.
Kóshede dabyldatqan «jedel járdem» kóre qalsaq, «kimniń kelini týǵaly jatyr eken?», dep jaqsylyqqa joryǵysh qasıetimiz bar ǵoı. Kólik kiltterin tabystaǵan oblys ákimi de aq halattylardyń aldynda sóılegen sózin osy tóńirekten bastady.
– Jyl qorytyndysy oblysymyz úshin tabysty bolyp otyr. Kórsetkishter óte jaqsy. Sizderdiń arqalaryńyzda oblysymyzda demografııa da qaryshtap damýda. Jyl saıyn 50-55 myń náreste dúnıe esigin ashady. Tipti Qaskeleńdegi aýrýhanada sábılerdiń kóptep dúnıege kelýinen dárigerlerdiń jumysy qarbalas bolyp tur. Bul úlken qýanysh! Osyǵan oraı kelesi jyly Uzynaǵashtan jańa emhana salynady. Bıyl mektep tabaldyryǵyn 49 myńǵa jýyq oqýshy attaǵan. Osyǵan oraı jańa tehnıkamen qamtamasyz etip jatyrmyz. Kelesi jyldan bastap oblysymyzda zamanaýı qural-jabdyqtarmen qamtylǵan aýrýhanalar men emhanalar salynady. Búgingi kúni asa kúrdeli operasııalardy oblysta óz dárigerlerimiz jasaı bastady jáne shetelde bilimderin jetildirýge múmkindik aldy. Tek sońǵy 3 jylda 50-den astam dáriger Ulybrıtanııa, Ońtústik Koreıa, Latvııa, Polsha, Izraıl, Túrkııa syndy alys shetelderde bilimin jetildirdi. Elbasynyń basshylyǵymen atqarylǵan osy ıgi sharalardyń bári de sizderdiń bolashaqqa senimmen qarap, alańsyz eńbek etýlerińizge jasalǵan jaǵdaı dep bilińizder, – dedi Amandyq Batalov.
Sońǵy jyldary emdeý mekemelerine 218 sanıtarlyq avtokólik kilti tabystalǵan. Al sol sandy tolyqtyryp otyrǵan 51 kólikti satyp alýǵa oblystyq bıýdjetten 640 mıllıon teńge qarjy jumsalǵan. Onyń 33-i sanıtarlyq, 18-i jelilik, reanımasııalyq jáne kardıo-reanımasııalyq brıgadaǵa arnalǵan kólikter. Aýdandar men qalalarǵa qajettilikke saı úlestiriletin bolady.
Almas NÚSIP, «Egemen Qazaqstan»
Almaty oblysy