Trotýardyń jıeginde kitap satatyn kisilerdi jıi kóremiz. Olar jerge gazet tósep, uzaq jyldar boıy sórede turǵandyqtan qaǵazdary sarǵaıyp, muqabalary mújile bastaǵan klassıkany kúnge jaıyp, keptirip otyrǵandaı áser qaldyrady.
Eriksiz bógelesiń. Úńilip qaraısyń. Kóńilińde bir ystyq sezim oıanady. Qımaısyń. Sol baıaǵy, stýdent kezde oqyǵan kitaptar. E.L.Voınıch «Bógelek», Stendal «Qyzyl men qara», Gı de Mopassan «Novellalar», E. Seton-Tompson «Haıýanattar jaıly áńgimeler»...
Eski tomdar men eńkeıgen qarttarǵa qarap: «Kitap kóneredi, adam qartaıady...» dep kóńilińizdi jubatqyńyz keledi.
Esesine bizdiń aınalamyzdaǵy tehnıka kún saıyn jańaryp keledi. Tańǵalasyz. Qyzyǵasyz.
Biraq... Jas kúnimizde, ıaǵnı, stýdenttik shaqta qyzyqqan tehnıka – «Volga», «Jıgýlı», «Moskvıchterdiń» qazir múlde kórinbeıtini esińizge túsedi.
Al sol kezdegi tanysqan klassıka jadymyzda áli saırap tur.
Nurǵalı Oraz, «Egemen Qazaqstan»