Ortalyq kommýnıkasııalar qyzmetinde QR IIM Tótenshe jaǵdaılar komıtetiniń ókili Rýslan Imanqulov gazdan ýlanýdyń aldyn alý boıynsha azamattyq qorǵaý organdarymen júrgizilgen jumystar týraly baıandady.
Onyń sózinshe Respýblıka boıynsha 28 adam gazdan ýlanyp, kóz jumǵan.
«Gazben ýlaný jańa problema emes. Ár jyl saıyn aýa raıy sýytqanda azamattarymyz arnaıy peshterdi paıdalanyp, ókinishke oraı ol peshterdi durys qaramaǵandyqtan ýly gazben ýlaný problemasy týyndap jatady. Búgingi tańda ıaǵnı, 2017 jyldyń qazan aıynan bastap búgingi kúnge deıin respýblıka boıynsha barlyǵy 28 adam kóz jumdy, 183 adam jaraqat aldy. Kóz jumǵandardyń arasynda 1 bala, jaraqat alǵandardyń ishinde 39 bala bar. Búgingi kúni bizdiń azamattyq qorǵaý organdarynyń qyzmetkerleri demalystarǵa qaramaı kúnde arnaıy reıdter júrgizedi. Ol reıdter barysynda azamattardyń úılerine kirip olarǵa arnaıy úgit-nasıhat paraqshalaryn taratyp, peshterdi aqaýsyz qalaı qoldaný keregi týraly aıtyp turady. Sondyqtan turǵyndardy olardyń aıtqanyn muqııat tyńdaýǵa shaqyramyz. Osyndaı tótenshe jaǵdaılardy boldyrmaý úshin bizdiń qyzmetkerler túrli sharalar atqarýda»,-dedi QR IIM Tótenshe jaǵdaılar komıtetiniń ókili Rýslan Imanqulov.
Resmı ókildiń málimetinshe qaza tapqandardyń kóbisi Qaraǵandy oblysy, Shyǵys Qazaqstan oblysy jáne Almaty oblysynyń turǵyndary.
Raýan QAIDAR,
«Egemen Qazaqstan».