Rásim barysynda Memleket basshysy Nursultan Nazarbaevqa Shvesııa Koroldiginiń Tótenshe jáne ókiletti elshisi Mats Foıer, Kýba Respýblıkasynyń Tótenshe jáne ókiletti elshisi Emılıo Pevıda Pýpo, Úndistan Respýblıkasynyń Tótenshe jáne ókiletti elshisi Prabhat Kýmar, Ulybrıtanııa jáne Soltústik Irlandııa Qurama Koroldiginiń Tótenshe jáne ókiletti elshisi Maıkl Djon Gıfford senim gramotasyn tapsyrdy.
Memleket basshysy rásimge qatysýshylardy Qazaqstandaǵy dıplomatııalyq mıssııalarynyń resmı túrde bastalýmen quttyqtap, olardyń jaýapty ári mártebeli mıssııalary elderimiz arasyndaǵy yntymaqtastyqty jan-jaqty damytýǵa septigin tıgizetinine senim bildirdi.
– Sizderdiń jumystaryńyz qyzyqty jáne jaýapty kezeńge tuspa-tus kelip otyr. Tehnologııalyq revolıýsııa jańa syn-qater ákelýmen qatar, kez-kelgen eldiń damýynda serpilis jasaýǵa múmkindik beredi. Sondyqtan Qazaqstan halqyna «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýymdy jarııaladym, – dedi Nursultan Nazarbaev.
Qazaqstan Prezıdenti álemniń ozyq damyǵan 30 eliniń qataryna qosylýdy jedeldetý úshin qajetti zamanaýı tehnologııalardy paıdalanýdyń mańyzdylyǵyn atap ótti.
– Men Joldaýda ekonomıkany, áleýmettik salany, sondaı-aq memlekettik basqarý isin damytýdyń negizgi baǵyttary boıynsha naqty on mindet qoıdym, – dedi Memleket basshysy.
Nursultan Nazarbaev Qazaqstannyń halyqaralyq arenada belsendi pozısııa ustanyp kele jatqanyn aıtyp, 2017 jyly Astanada ótken birqatar is-sharanyń nátıjelerine nazar aýdardy. Olardyń qatarynda ımıdjdik turǵydan ǵana emes, sondaı-aq ekonomıkalyq turǵydan oń áseri bolǵan halyqaralyq «EKSPO-2017» mamandandyrylǵan kórmesin, Shanhaı yntymaqtastyq uıymynyń sammıti men Islam yntymaqtastyǵy uıymynyń Ǵylym jáne tehnologııalar jónindegi sammıtin ataǵan jón.
– Sırııaaralyq qaqtyǵystardy retteýdiń jańa tetigi retindegi Astana prosesi aıasyndaǵy oń nátıjeler bizdiń eldiń derbes jáne beıtarap alań retinde tańdalýynyń durystyǵyn kórsetti jáne ony álemdik qoǵamdastyq moıyndady, – dedi Qazaqstan Prezıdenti.
Memleket basshysy Qazaqstannyń BUU Qaýipsizdik Keńesiniń tóraǵasy retinde qarastyratyn máselelerine jan-jaqty toqtalyp, jahandyq organnyń barlyq músheleriniń ózara ymyra men konsensýske kelýi úshin belsendi túrde kúsh jumyldyrýdyń mańyzdy ekenin aıtty.
– Biz taratpaý rejimin dáıekti túrde nyǵaıtý men keńeıtý arqyly ǵalamdy ıadrolyq qarýdan azat etý, sondaı-aq jahandyq soǵys qaýpiniń aldyn alyp, ony tolyq joıý úshin álemdik qoǵamdastyqtyń kúsh-jigerin jumyldyra berýge nıettimiz, – dedi Nursultan Nazarbaev.
Qazaqstan Prezıdenti Ulybrıtanııa jáne Soltústik Irlandııa Qurama Koroldiginiń Tótenshe jáne ókiletti elshisine arnaǵan sózinde ekonomıkalyq baǵyt elimizdiń sheteldik áriptestermen yntymaqtastyǵynyń basty ózegi bolyp sanalatynyn atap ótti.
– Elderimizdiń yntymaqtastyǵy ózara qurmet pen senimge berik negizdelgen. Búginde Ulybrıtanııa Qazaqstannyń iri ınvestorlarynyń jáne saýda áriptesteriniń biri bolyp sanalady, – dedi Memleket basshysy.
Nursultan Nazarbaev Shvesııamen yntymaqtastyqty damytýǵa aıryqsha mán beretinin atap ótip, Shvesııa Rıksdagynyń spıkeri Ýrban Alınniń elimizge sapary ótken jyldyń basty oqıǵasyna aınalǵanyn aıtty.
Qazaqstan Prezıdenti Nursultan Nazarbaev Prabhat Kýmardy Úndistannyń Shanhaı yntymaqtastyq uıymynyń tolyq múshesi bolýymen quttyqtap, Qazaqstan Úndistan Respýblıkasyn mańyzdy syrtqy saıası jáne saýda seriktesi retinde qarastyratynyn atap ótti.
– Elderińiz Shanhaı yntymaqtastyq uıymynyń jumysyna tyń serpin berip, mártebesin arttyrady dep senemin, – dedi Memleket basshysy.
Sonymen qatar, Nursultan Nazarbaev sońǵy jyldary Qazaqstan-Kýba qarym-qatynastary aıtarlyqtaı jandanǵanyn atap ótip, elderimizdiń saýda-ekonomıkalyq jáne saıası yntymaqtastyǵyn nyǵaıtý úshin naqty jumystardy jalǵastyrý qajet ekenin aıtty.
Sońynda Qazaqstan Prezıdenti dıplomattardy taǵy da quttyqtap, aldaǵy jumystaryna tabys tiledi.