Jyl basynan beri qazaqstandyq sportshylar el abyroıyn asqaqtatyp jatyr. Olardyń qatarynda ádettegideı kásipqoı boksshy Gennadıı Golovkın men shańǵyshy Alekseı Poltoranın bar.
Shańǵyshy Alekseı Poltoranın Slovenııada ótip jatqan Álem kýbogy kezeńinde jeńimpaz atandy. Poltoranın klassıkalyq ádispen 15 shaqyrym qashyqtyqta márege birinshi bolyp jetti. Ekinshi oryn alǵan norvegııalyq Iohannes Hoesflıot Klebo Alekseıden 13,2 sekýndqa qalyp qoıdy. A.Poltoranınnen 42,8 sekýndqa keıin kelgen shvesııalyq Kalle Halfarsson úzdik úshtikke jaıǵasty.
Otandasymyz osymen qysqy Olımpıada qarsańyndaǵy maýsymdyq jarystarda tórtinshi ret júldege ıe boldy. Osyǵan deıin ol 17 jeltoqsan kúni Italııanyń Toblah qalasynda Álem kýbogy kezeńinde 15 shaqyrym qashyqtyqta klassıkalyq tásilmen izge túsip jarysýda úshinshi oryn alsa, Lenserhaıdede (Shveısarııa) «Týr de Skı» kezeńinde klassıkalyq ádispen 15 shaqyrym qashyqtyqta júgirýde kúmis júldeger atandy. Sondaı-aq Italııanyń Val-dı-Femme qalasynda 6 qańtar kúni «Týr de Skı» kezeńinde 15 shaqyrym qashyqtyqta klassıkalyq ádispen chempıon atanǵan edi.
Endi Alekseı Ońtústik Koreıanyń Phenchhan qalasynda ótetin Olımpııa oıyndarynda medaldyń syńǵyryn estirtse, qanekeı. Babynda júrgen sportshymyz kók Týymyzdy jelbiretip, ánuranymyzdy shyrqatsa eken dep tileımiz.
Sonymen qatar kúlli boks álemine áńgimesi júretin «WorldBoxingNews.net» saıty 2017 jyldyń eń úzdik boksshysyn anyqtady. Úsh úmitkerdiń arasynan olar bizdiń otandasymyz Gennadıı Golovkındi tańdapty. Kroýford pen Lomachenkony shańyna ilestirmegen qazaqstandyq boksshy ótken jyldyń úzdigi atandy. Ataqty aǵylshyndyq saıttyń aıtqanymen ózgeleri de kelisip jatqany aıqyn. Sonymen birge «vringe.com» saıty 2017 jyldyń eń aıtýly kezdesýi Golovkın men Alvares arasynda ótti dep málimdedi. Eń kóp qaralǵan ári talqylanǵan boks kezdesýiniń jyry shynyn aıtý kerek áli de tarqamaı tur. Ekijaqty kelissózder júrip jatqanynan habardar bolyp otyrǵan Halyqaralyq boks qaýymdastyǵy Gennadıı men Saýldyń arasyndaǵy qarymta kezdesýdi mamyr aıynyń 5-ine belgilepti. Máseleniń mán-jaıy jaqyn arada anyqtalýy tıis.
Ermuhamed MÁÝLEN, «Egemen Qazaqstan»