Keshe Úkimet úıinde Premer-Mınıstr Baqytjan Saǵyntaevtyń tóraǵalyǵymen Qazaqstan Respýblıkasynyń ekonomıkasyn jańǵyrtý jónindegi memlekettik komıssııa otyrysy ótti, dep habarlady Premer-Mınıstrdiń baspasóz qyzmeti.
Otyrys barysynda Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty halyqqa Joldaýy aıasynda elimizdiń turaqty ekonomıkalyq ósimin jáne ekonomıkany jańǵyrtýdy qamtamasyz etýge baǵyttalǵan máseleler talqylandy.
Atap aıtqanda, 2016-2020 jyldarǵa arnalǵan jekeshelendirý josparlary, 2018 jyly «Samuryq-Qazyna» UÁQ toptarynyń keıbir aktıvterin básekeli ortaǵa berý tetikteri, aýyl sharýashylyǵy, ınvestısııalar jáne damý, qorǵanys jáne aeroǵarysh ónerkásibi, energetıka, qarjy, mádenıet jáne sport, bilim jáne ǵylym, densaýlyq saqtaý, eńbek jáne halyqty áleýmettik qorǵaý salalaryn jańǵyrtý jumysynyń júıesin retke keltirý boıynsha mınıstrlikterdiń tásilderi qaraldy.