Elbasynyń zııaly qaýym ókilderimen kezdesýine qatysqan aqyn Kúlásh tómendegi óleń joldaryn redaksııaǵa mynadaı ańdatpamen joldaǵan eken: “Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyqqa umtylýy jónindegi Prezıdenttiń bastamasy alǵash kóterilgen tusta jazylǵan jyr shýmaqtary Nursultan Ábishulymen kezdesý kezinde oıyma oralyp, “Egemenge” tutas kúıinde jarııalansa degen tilekpen joldap otyrmyn”. Memleket basshysynyń bastamasy júzege asyp, Qazaqstan EQYU-ǵa tóraǵalyqqa kirisken tusta aqynnyń tilegin qup alýdy jón kórdik.
Kúlásh AHMETOVA.
Sen – qazaqsyń!
Qazaq degen el bólek,
Qazaq salǵan soqpaq bólek, jol bólek.
Kıiz úıi Jer sııaqty jup-jumyr,
Shańyraǵy Kún sııaqty dóńgelek.
Sen – qazaqsyń!
Bir Allanyń qulysyń!
Adamǵa adam qul bolǵany – qurysyn.
Joıqyn soǵys, zulmattarda joıylmaı,
Qalǵan ultsyń. Qaharmansyń!
Ulysyń!
Sen – qazaqsyń!
Uly dala – tuǵyry.
Kúmbir-kúmbir kúreskerlik – ǵumyry,
Tireskenniń dirildetken tizesin
Tulparynyń tuıaǵynyń dúbiri!
Sen – qazaqsyń!
Alǵyzbaıtyn baryssyń!
Ar-ojdannyń asqaǵysyń, namyssyń!
Taǵdyryńdy tanyǵysy kelgender
Tasqa basqan tarıhyńmen tanyssyn!
Sen – qazaqsyń!
Baıyrǵy jurt – túzdegi eń,
Tabıǵattan tán tamyryn úzbegen.
Qolyn jaıyp, Kókten ómir suraǵan,
Jer betinen jeruıyqty izdegen.
Sen – qazaqsyń!
Qazynasy – násip, qut.
Qazaq bolý – ǵalamatqa ǵashyqtyq.
Jeriń, sýyń, taýyń sulý sonshalyq,
Kórgen kózden ketetindeı jas ytqyp!
Sen – qazaqsyń!
Otanshylsyń, tektisiń!
Dosyńa adal, dushpanyńa kektisiń.
Bul dalaǵa muragerlik, ıelik –
Urpaqtarǵa uly amanat dep túsin.
Sen – qazaqsyń!
Aılalysyń, eptisiń!
Aıbarlysyń, aqyldysyń, bettisiń!
Kóp bolýǵa,
Bir bolýǵa tıissiń,
Kórmeý úshin jattyń ezgi, tepkisin!
Sen – qazaqsyń!
Rýhy erkin, ózi erkin!
Muzbalaqsyń, sorǵalaǵan sózi erkin!
Qaıtalanbas kúıshisiń sen quıa alǵan
Dombyranyń ózegine óz órtin!
Sen – qazaqsyń!
Kele jatqan baǵy asyp,
Adamzattyq izgilikke jol ashyp,
Dastarqanyń – elshiligiń ejelden,
Meıirbansyń, meımandossyń qoly ashyq.
Sen – qazaqsyń!
Ǵaryshkersiń, jany – aspan.
О́relisiń, óz ornyna talasqan.
Tórge laıyq marqasqasyń, myqtysyń,
Tórtkúl dúnıe saıasatta sanasqan.
Sen – qazaqsyń!
Qazaq ediń týǵanda!
Onda, dúnıe taǵylymynan úlgi al da,
Ata jurttan, Ana tilden aırylma,
Tóbeńde Kún, tómende Jer turǵanda!