Premer-mınıstrdiń orynbasary – mádenıet jáne aqparat mınıstri Aıda Balaeva áleýmettik jelilerde beleń alǵan arandatýshylyq áreketterge qatysty resmı málimdeme jasady. Mınıstr keıbir áleýmettik jeli qoldanýshylarynyń eldegi mańyzdy saıası kezeńdi teris maqsatta paıdalanyp otyrǵanyn aıtty, dep jazady Egemen.kz.
Jańa Konstıtýsııa týraly jalǵan aqparat taratqan azamat jazalandy
Mınıstrdiń aıtýynsha, qazir qoǵamdyq-saıası ahýaldy turaqsyzdandyrý maqsatynda tanymal tulǵalardyń atynan jalǵan paraqshalar ashylyp, negizsiz úndeýler jarııalanyp otyr.
«О́kinishke qaraı, keıbir áleýmettik jeli qoldanýshylary jaǵdaıdy teris maqsatta paıdalanyp, elimizdegi qoǵamdyq-saıası ahýaldy turaqsyzdandyrýǵa baǵyttalǵan áreketterge baryp otyr. Arandatýshylar negizsiz aqparat taratyp, jalǵan paraqshalar men akkaýnttar ashqan (mysaly, Muhtar Shahanovtyń, Shavkat Rahmonovtyń jáne ózge de tulǵalardyń atynan ashylǵan feık-akkaýnttar arqyly til, jerdi satý sekildi máseleler boıynsha arandatýshylyq aqparat pen úndeýler jarııalanýda)», dedi mınıstr.
Muhtar Shahanov óz atynan taraǵan jalǵan aqparatty joqqa shyǵardy
Sonymen qatar mınıstr eldegi mıtıngiler týraly jalǵan habarlar men Konstıtýsııanyń jekelegen baptaryn burmalap túsindirý faktilerine toqtaldy. Onyń sózinshe, tipti buqaralyq aqparat quraldaryna tehnıkalyq shabýyldar jasaý jaǵdaılary da tirkelgen.
«Elde iri mıtıngiler men jappaı narazylyq aksııalary ótip jatyr degen jalǵan habarlar taratylyp, Konstıtýsııanyń jekelegen baptaryn ádeıi burmalap túsindirý faktileri de kezdesip otyr. Budan bólek, buqaralyq aqparat quraldary men tanymal paraqshalarǵa tehnıkalyq shabýyldar jasalyp jatqany týraly da habarlar túsip otyr. Qazirgi ýaqytta ýákiletti organ retinde biz bul jaǵdaıdy jan-jaqty zerdelep, tıisti sharalar qabyldap jatyrmyz. Osyǵan baılanysty tek resmı aqparat kózderine ǵana senýge jáne jalǵan málimetterdi taratpaýǵa shaqyramyn. Jalǵan aqparat taratý qylmystyq jáne ákimshilik jaýapkershilikke ákep soǵady», dedi Aıda Balaeva.