Osydan tórt-bes jyl buryn shyǵar, shapan kıgender erekshelenip kórinetin. Oıýly shapandy Naýryzda bir kıemiz degen sekildi ázil-shyny aralas pikir de jıi aıtylar edi. Qazir ózgerdi. Rýhanııat pen mádenıettiń dińgegi bekip keledi. Basqa jaqty bilmedim, Shyǵysta oıýly kıim sánge aınaldy. О́skemendegi atshaptyrym saýda úıleriniń birinde ulttyq kıim sherýi uıymdastyrylyp, saltanatty shapandardyń defılesi ótti.
Bul merekeni saýda úıinde ótkizýdiń de máni bar. Nege deseńiz, kisi qarasy qalyń. Halyqtyń kóbi keshki astaryn ishýge, kıno kórýge, saýda-sattyqtaryn jasaýǵa osy jaqqa aǵylady. Sóıte júrip ulttyq kıim kórmesin kóre qaıtady. Qala basshylyǵy osyny eskerip, rýhanı, mádenı sharalardy ara-tura saýda ortalyqtarynda ótkizip turady.
– Áz Naýryz qarsańynda túrli is-sharalardy qolǵa aldyq. Bári ulttyq bolmysymyzdy kórsetýge baǵyttalǵan. Baıqasańyzdar, memlekettik qyzmetker bolsyn, ustaz bolsyn kúndelikti oıýly beshpet, shapan kıip jumysqa barady. Qazaqı áshekeı-buıymdar da modaǵa aınaldy. Búgingi ulttyq kıimder úlgisi de rýhymyzdy asqaqtatýǵa baǵyttalǵan, – dedi oblystyq mádenıet jáne tilderdi damytý basqarmasynyń basshysy Samat Kásenov.
Qazaqılyqtyń ıisi ańqyp turǵan sán-saltanatty merekege mádenıet salasynyń qyzmetkerleri bir kisideı qatysty. Kireberisten bastalǵan sherý tórgi jaqtaǵy sahna mańyna baryp toqtady. Dombyra shanaǵynan tógilgen áýen men kómeıden shyqqan án atshaptyrym zaldy silkindirip jiberdi. Al zamanaýı úlgidegi qazaqı shapan men qamzol kıip shyqqan qyz-jigitterge kórermen súısine qarasty. Naýryz qarsańyndaǵy ulttyq kıimdi ulyqtaǵan oblys pen qala basshylyǵyna qatysýshylar men kórermender alǵystaryn jaýdyryp jatty.
О́SKEMEN