Keıingi jyldary elimizde jasandy ıntellekt pen sıfrlandyrý baǵytynda birqatar mańyzdy joba júzege asyp jatyr.
Sonyń biri – Nazarbaev ýnıversıteti Aqyldy júıeler men jasandy ıntellekt ınstıtýty (ISSAI) ázirlegen – «Oylan» modeli. Atalǵan ınstıtýttyń Syrtqy baılanystar jónindegi aǵa menedjeri Áıgerim Sársenovanyń aıtýynsha, bul – mátin, aýdıo jáne beınederekterin túsinip, olardy birge taldaı alatyn kópmodaldy generatıvti jasandy ıntellekt modeli.
– «Oylan» kúrdeli tapsyrmalardy oryndaý barysynda veb-izdeý júrgize alady jáne kópqadamdy oılaý arqyly sheshim usynady. Model ámbebap platforma retinde jasalǵan jáne ony ekonomıkadaǵy túrli salalarǵa beıimdep, naqty salalyq mindetterdi sheshý úshin qoldanýǵa bolady. Mysaly, bilim, analıtıka, medıa kontent jasaý, memlekettik qyzmetter jáne bıznes úderisterin avtomattandyrý sııaqty baǵyttarda paıdalanýǵa múmkindik bar, – deıdi ol.
Osy saladaǵy taǵy bir mańyzdy joba – «TilSync». Bul júıe qazaq, orys, aǵylshyn tilderinde naqty ýaqyt rejiminde joǵary sapaly sýbtıtr jasaýǵa múmkindik beretin JI qyzmeti. Mundaı tehnologııalar onlaın is-sharalar, konferensııalar, bilim platformalary, medıa jáne translıasııa salasynda keńinen qoldanylyp otyr. «TilSync» tildik kedergini azaıtyp, kóptildi aýdıtorııamen tıimdi jumys isteýge kómektesedi.
– Elimizdiń jasandy ıntellekt ekojúıesinde «MangiSoz» platformasy da erekshe oryn alady. Bul júıe mátin men sóıleýdi generasııalaý, aýdarý jáne taný qyzmetterin atqarady. Sonymen qatar ol qoljazba mátindi jáne qujat skandaryn taný (OCR), aýdıo jáne beınematerıaldardaǵy sóıleýshilerdi ajyratý (dıarızasııa), sondaı-aq ekspressıvti sıntezdelgen daýys jasaý múmkindigine ıe. Platforma qazaq, orys, aǵylshyn, túrik, qytaı, arab, ázerbaıjan, ıspan, fransýz, qyrǵyz, ózbek tilderin qoldaıdy. Qazir bul tehnologııa memlekettik organdarda, bilim mekemelerinde, korporatıvtik sektorda qoldanylyp keledi. Sonymen birge «Beynele» atty jasandy ıntellektige negizdelgen sýret generatory ázirlengen. Bul júıe elimizdiń áleýmettik-mádenı erekshelikterin dál beıneleıtin vızýaldar jasaýǵa múmkindik beredi. Iаǵnı jasandy ıntellekt arqyly jasalǵan beınelerde jergilikti mádenıet, dástúr, kıim úlgileri jáne ulttyq erekshelikter eskeriledi. Sondyqtan «Beynele» baspa isinde, marketıngte, bilim jobalarynda jáne kreatıvti ındýstrııada ulttyq kontentti damytýǵa kómektesedi», deıdi Á.Sársenova.
Onyń pikirinshe, ınfraqurylymdyq deńgeıde jasandy ıntellekt nemese mashınalyq oqytýda modeldiń qorytyndy shyǵarý júıesi de jasalǵan. Ol kommersııalyq qoljetimdi komponentter negizinde qurastyrylyp, ınstıtýt ázirlegen JI modelderin iske qosýǵa arnalǵan. Bul server uıymnyń jabyq jergilikti jelisinde jumys isteı alady, sondyqtan derekterdiń qaýipsizdigi joǵary deńgeıde saqtalady. Mundaı sheshimder memlekettik organdar men korporatıvtik sektorǵa óte mańyzdy, sebebi olar qupııa nemese sezimtal derektermen jumys isteıdi.
Munda aıta ketetin bir jaıt, atalǵan jobalardyń barlyǵy Nazarbaev ýnıversıteti janyndaǵy Aqyldy júıeler men jasandy ıntellekt ınstıtýtynda (Institute of Smart Systems and Artificial Intelligence – ISSAI) ázirlengen. Instıtýt elimizde jasandy ıntellekt tehnologııalaryn damytýǵa, qazaq tilindegi JI quraldaryn jetildirýge, olardy ǵylym, bıznes pen memlekettik sektorda keńinen engizýge baǵyttalǵan zertteýler júrgizip keledi. Sonymen birge jeke sektorda da tabysty sıfrlyq jáne JI jobalarmen aınalysyp otyr. Mysaly, «Cerebra» – ınsýltti erte anyqtaýǵa arnalǵan medısınalyq jasandy ıntellekt júıesi, ol álemniń birneshe elinde qoldanylady. «Higgsfield AI» generatıvti vızýaldy jáne beıne-kontent tehnologııalaryn damytý baǵytynda jumys isteıdi. Al «Shai Pro» sııaqty kompanııalar bıznes-úderisterdi avtomattandyrýǵa, kompanııalardyń tıimdiligin arttyrýǵa arnalǵan JI quraldaryn usynady.