Mamyr aıynan bastap Qazaqstanda birqatar mańyzdy ózgerister kúshine enedi. Jańashyldyqtar salyq, bilim berý, kólik, sıfrlyq aktıvter jáne basqa da salalardy qamtıdy, dep habarlaıdy Egemen.kz.
Eń aldymen, mobıldi aýdarymdarǵa baqylaý kúsheıtiledi. Salyq organdary bankterden alynǵan málimetterdi taldaýdy bastaıdy. Eger úsh aı qatarynan 100 túrli adamnan aqsha túsip, jalpy somasy 1 mln 20 myń teńgeden assa, mundaı aýdarymdar tekseriledi. Alǵashqy habarlamalar mamyr aıynda jiberiledi.
Sondaı-aq Reseı men Belarýsten ákelinetin kólikter úshin ýtıl alymy ósedi. Al Qazaqstanda óndirilgen nemese basqa elderden ımporttalǵan kólikterge qatysty talap ózgerissiz qalady.
Sıfrlyq aktıvter salasynda da ózgeris bar. 1 mamyrdan bastap steıblkoındardy shyǵarý men aınalymǵa engizýdiń biryńǵaı erejeleri kúshine enedi. Endi mundaı aktıvter tolyq qarjylaı qamtamasyz etilýi tıis jáne olardy tek jarǵylyq kapıtaly keminde 200 mln teńge bolatyn zańdy tulǵalar ǵana shyǵara alady.
Mınıstr UBT-ǵa qatysty jańasha ózgeristerdiń qandaı bolatynyn jarııalady
Mamyr-qazan aılary aralyǵynda elimizde áskerı jıyndar ótkiziledi. Oǵan shamamen 3 myńǵa jýyq áskerı mindetti azamat shaqyrylady.
4 mamyrdan bastap KEDEN aqparattyq júıesi engizilip, kedendik tólemderdi tóleý tártibi ózgeredi. Keıbir tólemderdiń bıýdjettik jikteý kodtary jańartylady.
Energetıka salasynda da ózgeris bar: Reseı 1 mamyrdan bastap Qazaqstan munaıyn Germanııaǵa «Drýjba» qubyry arqyly jetkizýdi toqtatpaq. Osyǵan baılanysty 260 myń tonna munaı balama baǵyttar arqyly tasymaldanady.
Dinı salada Imam AI atty jańa sıfrlyq servıs pılottyq rejımde iske qosylady. Ol dinı suraqtarǵa jedel jaýap berýge arnalǵan.
Sonymen qatar qara jáne tústi metall synyqtaryn elden shyǵarýǵa qoıylǵan tyıym taǵy alty aıǵa uzartylady.
Bilim berý salasynda 27 mamyrdan bastap 1-synypqa qujat qabyldaý bastalyp, 31 tamyzǵa deıin jalǵasady. Al negizgi UBT 10 mamyr men 10 shilde aralyǵynda ótedi. Talapkerler testileýdi eki ret tapsyryp, eń úzdik nátıjesimen grant konkýrsyna qatysa alady.
UBT formaty ózgeredi: Endi talapkerler bir-aq ret test tapsyrady
Áýe qatynasy da keńeıedi. Almaty men Pýsan arasynda tikeleı reıs ashylady. Sonymen qatar Asiana Airlines áýe kompanııasy Seýl – Almaty baǵytyndaǵy reıster sanyn arttyrady.
Mamyr aıynda qajylyq maýsymy da bastalady. Ol 15 mamyr men 5 maýsym aralyǵynda ótedi. Qajylar úshin Almaty, Astana jáne Shymkent qalalarynan tikeleı reıster uıymdastyrylady.