Qazaq memlekettik qyzdar pedagogıkalyq ýnıversıtetine Túrkııanyń Nııde Omer Halısdemır Ýnıversıtetiniń rektory Mýhsın Karmen bastaǵan delegasııa keldi. Bul týraly Qyzdar Ýnıversıtetiniń Baspasóz ortalyǵy habarlady.
Arnaıy sapar aıasynda uıymdastyrylǵan basqosýda qos joǵary oqý orny arasyndaǵy yntymaqtastyq jaıy keńinen sóz boldy.
Jıyndy ashqan Qyzdar Ýnıversıtetiniń rektory Gaýhar Aldambergenova bilim ordalarynyń ortaq uqsastyǵy men áleýeti týrasynda sóz qozǵap, akademııalyq utqyrlyq baǵdarlamasy aıasynda muǵalimder men stýdentter almasý qajettigin atap ótti. Sonymen qatar, kezdesýde taraptar ǵylymı-mádenı qarym-qatynastardy nyǵaıtýǵa baǵyttalǵan ózara tıimdi ekijaqty damytý máselelerin talqylady.
Basqosýdyń ekinshi bóliminde ýnıversıtet rektorlary ózara yntymaqtastyq týraly memorandýmǵa qol qoıdy. Qujat joǵary jáne joǵary oqý ornynan keıingi bilim, ǵylym men mádenıet, ǵylymı-zertteý salasy aıasyndaǵy yntymaqtastyqty damytýdy qarastyrady.
– Aldyna qazirgi zaman talabyna tolyq jaýap bere alatyn pedagog kadrlardy daıarlaýdy maqsat etip qoıǵan Qazaq memlekettik qyzdar pedagogıkalyq ýnıversıteti óziniń bul oraıdaǵy qyzmetin, negizinen, Prezıdenttiń 2016 jyly 1 naýryzda qabyldanǵan «2016-2019 jyldarǵa arnalǵan QR bilim jáne ǵylymdy damytý jónindegi» memlekettik baǵdarlamasy aıasynda júrgizedi. Ýnıversıtet 6 fakýltettiń 28 kafedrasynda bakalavr boıynsha – 42, magıstratýra boıynsha – 23 jáne PhD doktorantýra boıynsha 4 mamandyq negizinde muǵalimder daıyndaıdy. Buǵan qosa, syrttaı oqý bóliminiń stýdentteri 20 mamandyq boıynsha qashyqtyqtan oqytý tehnologııasyn paıdalanyp, bilim alyp júr. Olarǵa 54 ǵylym doktory, 200-ge jýyq ǵylym kandıdaty dáris beredi. Qazirgi tańda Qyzdar Ýnıversıteti álem elderiniń 20-dan astam joǵary oqý ornymen yntymaqtastyq ornatqan. Olardyń qatarynda AQSh, Úndistan, Fransııa, Qytaı, Germanııa syndy memleketterdiń bedeldi ýnıversıtetteri bar, – dedi óz sózinde Gaýhar Aldambergenova.
Al, Mýhsın Karmen ózi basqaratyn joǵary oqý orny týraly áńgimelep, áriptestik ornatýǵa nıetti ekendigin jetkizdi.
– Nııde Omer Halısdemır Ýnıversıteti Túrkııanyń irgeli joǵary oqý oryndarynyń biri. Bilim ordasynyń ataýy 2016 jylǵy shilde aıynda Túrkııada oryn alǵan áskerı tóńkeris kezinde qastandyqpen óltirilgen serjanttyń esiminiń qurmetine berilgen. Ýnıversıtet qalashyǵy Nııde qalasynan 6 shaqyrym qashyqtyqta ornalasqan. Ashylǵanyna 26 jyl bolǵan oqý orny osy jyldar aralyǵynda respýblıkamyzdyń bilim berý júıesi úshin joǵary bilikti pedagog kadrlar, ekonomıster, arhıtektorlar, aýyl sharýashylyǵy salasynyń mamandaryn, ınjenerler men ǵylymı qyzmetkerler daıarlap keledi. Ýnıversıtet túlekteriniń qatarynda elimizdiń barlyq salasynda eseli eńbek etip kele jatqan kóptegen azamattar bar. Búginde oqý ornyndaǵy 6 fakýltet, 2 ınstıtýt, 2 kolledj jáne 6 kásibı kolledj 30-dan astam mamandyq boıynsha bilim beredi. Qazirgi kúnde ýnıversıtette 25 myńnan astam stýdent oqýda, olarǵa 1000-nan astam professor-oqytýshylar dáris beredi. Qalashyq ornalasqan aýmaqtaǵy oqý korpýstary, jataqhana men Mádenıet ortalyǵy, sport alańdary, basseın, sporttyq-saýyqtyrý kesheni, Aqparattyq-tehnologııalar ortalyǵy, oqý zerthanalary, mamandandyrylǵan pán kabınetteri, zamanaýı qural-jabdyqtarmen qamtamasyz etilgen kompıýter klastary, kitaphana stýdentterdiń sapaly bilim alýyna qyzmet kórsetedi, – dep atap ótti Mýhsın Karmen.
Jıyn barysynda Qyzdar Ýnıversıtetiniń fakýltet dekandary da ózara yntamaqtastyqty arttyrý týrasynda sóz qozǵap, kókeılerinde júrgen saýaldaryn qoıdy.
Sapar aıasynda túrkııalyq joǵary oqý ornynyń ókilderi ýnıversıtet mýzeıinde jáne Latyn álipbıin úıretý ortalyǵynda boldy. Jýyrda ashylǵan ortalyqta oqý ornynyń professor-oqytýshylary men stýdentteri latyn grafıkasy negizindegi jańa qazaq álipbıi boıynsha oqyp, jazýdy meńgeredi.