Premer-mınıstrdiń orynbasary – Mádenıet jáne aqparat mınıstri Aıda Balaeva men týrızm jáne sport mınıstri Erbol Myrzabosynov Jetisý oblysyndaǵy týrıstik ınfraqurylymnyń jazǵy maýsymǵa daıyndyǵymen tanysyp, Alakól jaǵalaýyndaǵy negizgi nysandardyń jaı-kúıin tekserdi, Egemen.kz.
Jumys saparyna ortalyq memlekettik organdardyń, Úkimet apparatynyń, salalyq vedomstvolardyń ókilderi, sondaı-aq Jetisý oblysynyń ákimi Beıbit Isabaev qatysty. Tekserý barysynda Úkimet basshysynyń orynbasary qonaqúı keshenderi, káriz-tazartý qurylystary nysany, Kóktuma aýylyndaǵy jaǵalaýdy bekitý ýchaskesi jáne Úsharal qalasynyń áýejaıyn aralady. Ár baǵyt boıynsha nysandardyń qazirgi daıyndyǵy men jobalardyń iske asý qarqyny jóninde baıandaldy.
Oblys ákimdigi jaǵalaýdy jazǵy týrıstik maýsymǵa daıyndaý baǵytynda aýqymdy ári júıeli jumys júrgizip keledi. Bul jumystar Memleket basshysynyń tapsyrmasyna sáıkes júzege asyrylýda. Prezıdent ótken jyly da týrıstik aımaqtarda tártip ornatý, ınjenerlik jáne kólik ınfraqurylymyn damytý, sondaı-aq ınvestorlar úshin naqty qolaıly jaǵdaı jasaý máselelerine erekshe nazar aýdarǵan bolatyn. Búginde bul másele Memleket basshysynyń aıryqsha baqylaýynda. Atap aıtqanda, jalpy uzyndyǵy 488 shaqyrymdy quraıtyn Taldyqorǵan – Úsharal jáne Úsharal – Dostyq avtomobıl joldaryn rekonstrýksııalaý aıaqtalyp, jaǵalaýdyń kólik qatynasy edáýir jaqsarǵan. Úsharal áýejaıynyń ushý-qoný jolaǵyn jańǵyrtýdan keıin iri áýe kemelerin qabyldaýǵa múmkindik jasalyp, qosymsha termınal salý jobasy da ázirlengen.
«Týrıstik aımaqtyń ınjenerlik ınfraqurylymy da edáýir nyǵaıtylǵan. 57 shaqyrym elektr jelisi men eki qosalqy stansa qurylysy aıaqtaldy. Bul burynǵy qýat tapshylyǵyn joıyp, aldaǵy kezeńge qajetti elektr energııasynyń qoryn qalyptastyrýǵa múmkindik berdi. Aqshı aýylynda 69 shaqyrym káriz jelisiniń qurylysy aıaqtaldy. Aqshı men Kóktumadan shyǵatyn aǵyn sýlardy qabyldap, tazalap, sýdy tehnıkalyq maqsatta qaıta paıdalanýǵa múmkindik beretin tazartý qurylystary jobasyn iske asyrý jalǵasýda. Nysandy bıylǵy qazan aıynda tolyq jabdyqtap, ınjenerlik jelilerge qosý josparlanǵan. Osylaısha jaǵalaýdaǵy sanıtarııalyq jaǵdaı, sý burý jáne ekologııalyq qaýipsizdik máseleleri kezeń-kezeńimen sheshimin taýyp keledi», dep habarlady Úkimettiń baspasóz qyzmeti.
Jaǵalaýdy bekitý jumystarynyń barysyna da basa nazar aýdaryldy. Joba Alakól jaǵalaýynyń 13 shaqyrym aýmaǵyn qamtıdy. Tekserý barysynda birqatar ýchaskelerde, sonyń ishinde jaǵalaýǵa jaqyn ornalasqan nysandar mańynda jaǵanyń shaıylý belgileri bar ekeni tirkeldi. Týrıstik nysan ıeleriniń aıtýynsha, qys mezgilinde iri muz massalary jyl saıyn jaǵalaý jıegine áser etip, topyraqty shaıyp, jaǵajaı aýmaǵyna zaqym keltiredi. Sonyń saldarynan kásipkerler ár maýsym saıyn jaǵajaılardy qalpyna keltirýge jáne abattandyrýǵa qaıtadan qarjy salýǵa májbúr. Qazirgi ýaqytta Kóktumada 960 metr, Aqshıde 200 metr aýmaqta jaǵalaýdy bekitý jumystary atqarylǵan. Bul baǵyttaǵy jumystar jalǵasýy tıis. О́ıtkeni aýmaqtyń qorǵalýy, nysandardyń saqtalýy jáne jaǵalaýdyń odan ári damýy soǵan tikeleı baılanysty.
Alakólge poıyz jáne áýe bıletteri qashan satyla bastaıdy?
Jaǵalaýdyń sanıtarııalyq daıyndyǵy jóninde de jeke baıandaldy. Osy maqsatta kommýnaldyq baza nyǵaıtylyp, sanıtarııalyq tazartý jumystaryna qosymsha 42 birlik arnaıy tehnıka satyp alynǵan. Maýsymdyq brıgadalardyń jumysy kúsheıtilip, qoqysty júıeli shyǵarý, qoǵamdyq keńistikter men jaǵajaı aýmaǵyn kútip ustaý sharalary uıymdastyrylyp jatyr.
Maýsymnyń jaqyndaýyna baılanysty qaýipsizdik máselelerine de erekshe nazar aýdaryldy. Jaǵalaýda qutqarý bólimsheleri jumys isteıdi, jazǵy kezeńde maýsymdyq qutqarýshylar qosymsha tartylady, tehnıka jáne qural-jabdyqpen jaraqtandyrý kúsheıtiledi. Sonymen qatar beınebaqylaý, dron arqyly monıtorıng, qoldanystaǵy shekteýler men quqyq buzýshylyqtar úshin jaýapkershilik týraly aqparattyq eskertpeler ornalastyrý kózdelgen. «Taza Qazaqstan» jáne «Zań men tártip» qaǵıdattary jaǵalaýdyń búkil aýmaǵynda naqty kórinis tabýǵa tıis ekeni atap ótildi. Bul eń aldymen tazalyqtan, tártipten, belgilengen talaptardyń saqtalýynan jáne barlyq qyzmetterdiń úılesimdi jumysynan baıqalýy qajet.
Jetisý oblysynda bıyl úsh birdeı jańa ekopark qurylady
Kún tártibinde týrıstik saladaǵy eńbek qatynastary máseleleri de qaraldy. Ásirese jastar men stýdentterge qatysty beıresmı jumyspen qamtýdyń aldyn alý qajettigine erekshe mán berildi. Barlyq eńbek qatynastary, eńbekaqy tóleý jáne eńbek jaǵdaılary turaqty baqylaýda bolýy tıis.
Alakóldi daıyndaýmen qatar, oblys ákimdigi Balqash kólindegi týrıstik ınfraqurylymdy damytý baǵytynda da jumys júrgizip jatqany aıtyldy. Jaǵalaý aımaǵynyń bas jospary men egjeı-tegjeıli josparlaý jobasy bekitilgen, abattandyrý jumystary júrgizilýde, jaǵajaı ınfraqurylymyn aıaqtaý 15 maýsymǵa josparlanǵan. Sonymen qatar aýmaqty odan ári damytýǵa jáne ınvestısııa tartýǵa baǵyttalǵan ilespe jobalar júzege asyrylyp jatyr.
Balqash kóli jaǵalaýyndaǵy jer ýchaskeleri ınvestorlarǵa ashyq aýksıon arqyly usynylady
Aıda Balaeva atqarylǵan jumystar jaǵalaýdyń jańa ınfraqurylymdyq negizin qalyptastyryp jatqanyn atap ótti. Sonymen birge demalýshylar aǵynynyń ulǵaıýyn eskere otyryp, basty ólshem naqty nátıje men barlyq qyzmetterdiń daıyndyǵy bolyp qala beretinin aıtty.
Jumys saparynyń qorytyndysy boıynsha Premer-mınıstrdiń orynbasary jaǵalaýdyń jazǵy maýsymǵa tolyq daıyndyǵyn qamtamasyz etýdi, negizgi ınfraqurylymdyq jobalardy belgilengen merzimde aıaqtaýdy, qaýipsizdik pen sanıtarııalyq kútip-ustaý sharalaryn kúsheıtýdi, demalýshylarǵa arnalǵan kórneki profılaktıkalyq túsindirý jumystaryn jolǵa qoıýdy, sondaı-aq týrıster aǵynynyń ósýi men ishki týrızmdi damytýdyń uzaqmerzimdi mindetterin eskere otyryp, týrıstik aımaqty júıeli jańǵyrtýdy jalǵastyrýdy tapsyrdy.