Oqýshylar qus sanaýǵa shyqty

Bul sýly-batpaqty alqapta ár merzimde 175 túrli sýda júzetin jáne sý mańynda ómir súretin qustar tirshilik etedi. Onyń ishinde suńqyldaq aqqý, buıra jáne alqyzyl birqazan, sary, egıpettik jáne kishkentaı aqqutan, flamıngo, qalbaǵaı, qarabaı, qarabasty ógizshaǵala, aqquıryq sý búrkitteri sekildi 20-dan asa qus Qazaqstannyń Qyzyl kitabyna engen.

«Qoldaý-Qazaqstan» kópbeıindi kommersııalyq emes holdıngi janyn­daǵy «Qoldaý-Ekologııa» maman­dan­dyrylǵan ortalyǵynyń jetekshisi Á.Qozybaqovtyń sózinshe, qustar sanaǵy álemniń 100-den astam elinde 1967 jyldyń qańtar aıynyń ortasynan bas­tap júrgizile bastaǵan. Qazirde bul sanaq jyl saıyn uıymdastyrylady.

Qaraqııa-Qarakól memlekettik eko­logııa­lyq qoryqshasynyń bóligi bolyp esep­teletin Qarakóldegi qustar sana­ǵynyń nátıjesinde, balalar 6 suń­qyldaq aqqýdy, 4 myńǵa jýyq sy­byrlaq aqqýdy, 300-den asa baryl­daýyq (jabaıy úırek), 70 ­súńgýir úırekti, 50-ge jýyq ózen qar­qyl­daý­yǵyn, 2 anyqtalmaǵan ıtelgi, 3 aqquı­ryq sýbúrkitin jáne 200-deı ár túrli sha­ǵa­lalardy sanady jáne jas ekolog­tar saraptama úshin aýanyń, sý­dyń, topy­raq­tyń synamalaryn aldy. PASCO ám­bebap quralynyń kómegimen sý­dyń, topy­raqtyq, aýanyń temperatýra­syn anyq­tap, aýa ylǵaldylyǵyn, baro­met­rııa­lyq qysymdy sý men topyraq qysh­qyl­dyǵyn ólshedi.

– Qarakóldegi qustardyń sany jónindegi bizdiń úsh jyl boıy jınaǵan derekterimiz ornıtolog-mamandarǵa sýda jáne onyń mańynda ómir súretin qustar jónindegi aqparatty jahandyq turǵydan kórýge kómek beredi degen úmittemiz. Sanaq barysynda alynǵan úlgiler Qarakóldegi tirshilik etetin janýarlardyń problemalaryn zertteý úshin júrgiziletin ǵylymı jobalarǵa paıdalanylady, – deıdi atalǵan mektep dırektorynyń ǵylymı-ádistemelik jumystary jónindegi orynbasary Baqytgúl Jaqsylyqova.

Gúlaıym ShYNTEMIRQYZY,

«Egemen Qazaqstan»

Mańǵystaý oblysy