Memleket basshysy Nursultan Nazarbaev Úkimet basshysynyń orynbasary Asqar Jumaǵalıevke eskertý jasap, sıfrlandyrý máselesin xalyqqa túsinikti tilde jekizýdi tapsyrdy.
"Sıfrlandyrý barlyq máselelerimizdi sheship beretin nárse emes. Bul - ındýstrııaldy revolıýsııanyń basy ǵana. Demek, alda turǵan maqsat-mindetter kóp. Eń sońynda jasandy ıntellektke kelýimiz kerek", - dedi N.Nazarbaev. Onyń aıtýynsha, taý-ken salasyna aqparattyq texnologııalardy engizý arqyly eńbek ónimdiligin arttyrýǵa bolady. Sebebi jumys avtomatty túrde júredi. Ásirese, densaýlyq pen bilim salasyna sıfrlandyrýdy keńinen engizgen jón. Sonyń arqasynda shalǵaı aýylda otyrǵan adamnyń desaýlyǵyn baqylaýǵa ári bilimin arttyrýǵa múmkindik bar. Al adam kapıtalyn arttyrsaq, el ekonomıkasyn da kóterýge bolady. Memleket basshysy Nursultan Nazarbaev Úkimet basshysynyń orynbasary Asqar Jumaǵalıevke eskertý de jasady. Sebebi dál osy máselege jaýapty vıse-premer sıfrlandyrýdyń mańyzdylyǵyn túsinikti tilde baıandaı almady.
"Búgin bizde semınar ótip jatyr dep kóreıik. Dál osylaı túsindiretin bolsaq, shopandy bylaı qoıǵanda, basshynyń ózi túsinbeıdi. Sen sıfrlandyrýdy táptishtep túsindire bilýiń kerek. Sıfrlandyrý qaıdan shyqty? Ne úshin kerek? Máselen, Sarybaı-Sokolov taý-ken kombınatyn alaıyq, olar karer jumystaryn avtomatty túrde baqylap otyrady. Sonyń arqasynda óz shyǵyndaryn 30 paıyzǵa azaıtty. Kim biledi, bolashaqta karerde kólik júrgizýshileri de bolmaıtyn shyǵar. Osylaısha, óndiris kólemin arttyrýǵa bolady. Áıtpese, qazirgi básekege tótep berý múmkin emes. Mine, osylaı túsindirý kerek", - dep atap kórsetti N.Nazarbaev.
Prezıdenttiń aıtýynsha, densaýlyq salasyndaǵy sıfrlyq texnologııalar árbir adamnyń densaýlyǵyn onlaın rejımde baqylaýǵa múmkindik beredi. Sonyń arqasynda dárigerler qaǵazbasty jumystan qutylady. Sol sııaqty keden men salyq salasyn sıfrǵa aýystyrý arqyly biraz jumysty jedeldetýge bolady. Shekarada júk kólikteri kóp bógelmeıdi. Jalpy, 2025 jylǵa qaraı sıfrlandyrýdyń tıimdiligi 2 trln teńgege jetedi degen boljam bar.
Sondaı-aq Nursultan Nazarbaev memlekettik qyzmetshilerdi jappaı sıfrlandyrýǵa úıretýdi tapsyrdy
"Memlekettik qyzmet isteri akademııasynda (QR Prezıdenti janyndaǵy Memlekettik basqarý akademııasy - avt.) sıfrlandyrý boıynsha arnaıy semınarlardy ótkizý kerek dep oılaımyn. Sol jerde kásibı mamandar sıfrlandyrýǵa jaýapty ortalyq jáne aımaqtyq basshylarǵa bárin jiti túsindirip bersin. Sońynda barlyǵy emtıxan tapsyryp, arnaıy kýálik alsyn. Osy máseleni pysyqtap alý qajet. "Nur Otan" partııasy da atsalysýy tıis", - dedi N.Nazarbaev Úkimettiń keńeıtilgen otyrysynda. Aıta keteıik, májilis kezinde Memleket basshysy sıfrlandyrý máselelerin xalyqqa keńinen túsindirýdi júktedi. "Sıfrlandyrý barlyq máselelerimizdi sheship beretin nárse emes. Bul - ındýstrııaldy revolıýsııanyń basy ǵana. Demek, alda turǵan maqsat-mindetter kóp. Eń sońynda jasandy ıntellektke kelýimiz kerek", - dep atap kórsetti N.Nazarbaev.