Búgin Aqparat jáne kommýnıkasııalar mınıstrliginde QR Premer-mınıstriniń orynbasary Asqar Jumaǵalıevtiń qatysýymen keńeıtilgen alqa otyrysy ótti.
Kezdesý barysynda «Azamattarǵa arnalǵan úkimet» memlekettik korporasııasynyń basqarma tóraǵasy Abylaıhan Ospanov 2017 jyly atqarylǵan jumystardyń qorytyndysy men bıylǵy jyldyń maqsat-mindetteri týraly baıandady. Sondaı-aq ol byltyr 29 jeltoqsanda iske qosylǵan bala týý boıynsha proaktıvti qyzmet jelisimen de bólisti. Osy jobaǵa sáıkes jańa bosanǵan 34 myńnan astam áıelge memlekettik qyzmetterdi telefon arqyly alý usynysymen SMS-habarlama joldanyp, onyń 16 myńnan astamy bul múmkindikti tıimdi paıdalanǵan. Proaktıvti memleketke kóshýge baǵyttalǵan joba aıasynda front-ofıske barmaı-aq, tipti úıden shyqpaı-aq, týý týraly kýálik pen tıisti járdemaqylardy rásimdeýge, sábıdi balabaqshaǵa kezekke qoıýǵa bolady. Jýyrda jańa týǵan balany SMS kómegimen turǵylyqty jerge tirkeý qyzmeti de iske qosylady.
«Bıyl biz jyljymaıtyn múlik ıesiniń málimetteriniń ózgerýine, zeınetaqy jınaqtarynyń saqtalýyna memlekettik kepildik tólenýine, sondaı-aq múgedektikti belgileý men atqarýshylyq is júrgizýdi qozǵaýǵa qatysty memlekettik qyzmetterdi kórsetý barysyn da proaktıvti tásilge kóshiremiz», - dedi A. Ospanov. Sondaı-aq bıyl halyqtyń sıfrlyq saýattylyǵyn 77 paıyzǵa deıin arttyrý kózdelgen. Osy maqsatta aldaǵy ýaqytta el boıynsha taǵy 15 sıfrlyq halyqqa qyzmet kórsetý ortalyǵy (HQO) ashylady. Qazirgi tańda sıfrlyq HQO tek Astana qalasynda bar.
Eske sala keteıik, 2017 jyly memlekettik korporasııa 38 mıllıonnan astam memlekettik qyzmet kórsetip, onyń 63 paıyzyn elektrondyq nusqada usyndy.
Aıa О́mirtaı,
«Egemen Qazaqstan»