Elbasy Nursultan Nazarbaev bıylǵy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda baspanamen qamtý kórsetkishin 2030 jyly bir turǵynǵa shaqqanda 30 sharshy metrge jetkizý mindetin qoıdy.
Osyǵan oraı, tómendegi máseleniń ózektiligin atap ótý qajet dep sanaımyn. Búgingi kúni respýblıkamyzdyń kóptegen qalalarynda «apattyq» jaǵdaıda dep tanylǵan úıler barshylyq. «Apattyq» dep tanylǵan úılerdiń turǵyndary jergilikti atqarýshy organdarda turǵyn-úı alý kezegine tirkelgen.
Qoldanystaǵy zańnamaǵa sáıkes, jergilikti atqarýshy organdarǵa apatty jaǵdaıda dep tanylǵan úılerde turyp jatqan azamattardyń otbasylaryn turǵyn úımen qamtamasyz etý mindeti júktelgen. Biraq bul máseleni sheshýde qoldanystaǵy zańnama áli tolyq sheshim jasaı almaıdy. О́ıtkeni apatty jaǵdaı dep tanylǵan úıdegi azamattar turǵyn úı alý kezegine ártúrli mezgilde tirkelgen. Eger apatty úı kútpegen jerden jaramsyz bolyp, isten shyqsa turǵyndardyń bári birdeı úı ala almaı, jartysy baspanasyz qalady. Mysaly, qos qabatty turǵyn úıde 18 otbasy turyp jatyr delik. Olardyń turǵyn úıge tirkelý kezegi ártúrli, birinshi tirkelgen otbasylardy turǵyn úımen qamtamasyz etý múmkindigi bolsa, sońǵy tirkelgen otbasynyń kezegi 10 jyldan soń kelýi múmkin. Turǵyndar on jyldy kúte almaıdy ǵoı, demek apattyq turǵyn úıdegi azamattardyń barlyǵyn bir mezette turǵyn úımen qamtamasyz etý qajet.
Sondyqtan men Premer-Mınıstr Baqytjan Saǵyntaevtyń atyna apattyq jaǵdaıdaǵy úılerdi joıý maqsatynda, turǵyn úı qurylysyn «Nurly jer» turǵyn úı qurylysy baǵdarlamasynyń bir baǵyty retinde engizý týraly qoldanystaǵy zańnamaǵa tıisti ózgerister qarastyrýdy usynyp, depýtattyq saýal joldadym.
Erbolat MUQAEV,
Senat depýtaty