Memleket basshysy Nursultan Nazarbaev Parlament palatalarynyń birlesken otyrysynda elimizdegi árbir otbasynyń baspanaly bolý máselesin qozǵady. Sonymen qatar, «7-20-25» baǵdarlamasyn usyndy.
Elbasy óz sózinde sońǵy jyldary ár otbasynyń baspanaly bolýy úshin úlken ister atqarylǵanyn aıtty.
«О́tken jyly 11,2 mln sharshy metr úı qoldanysqa berildi. Bul buryn-sońdy bolmaǵan rekord bolyp esepteledi. Degenmen bul da jetkiliksiz. Elimizde jeke baspanasy joq otbasylar áli de bar», dedi Elbasy.
Memleket basshysy sóz arasynda bul máseleni sheshý úshin turǵyn úı ıpotekasyn qoljetimdiligin arttyrýdy, arzan resýrstardy qamtamasyz etýdiń mehanızmi kerektigin, osynyń arqasynda árbir jumys isteýshi nesıege páter satyp ala alatynyn jáne otbasylyq bıýdjet múmkindigin esepke ala otyryp, zaımǵa qyzmet etetinin málimdedi.
Prezıdent usynylǵan «7-20-25» baǵdarlamasynyń negizgi parametrlerin jarııalady. Iаǵnı, árbir jumys isteıtin qazaqstandyqtyń mynadaı sharttarda teńge boıynsha ıpotekalyq nesıe alýǵa múmkindigi bolady. Nesıe ósimi jylyna 7 paıyzdan aspaıdy, ıaǵnı qazirgideı 14-16 paıyz emes. Bastapqy jarna bankterde 30 paıyzdy, keıbirinde 50 paıyzdy qurasa, jańa baǵdarlama boıynsha ol 20 paıyzdan aspaıdy. Nesıe merzimi burynǵydaı 10-15 jyldy emes 25 jyl bolmaq.