Shyǵys Qazaqstan oblysynyń ákimi Danıal Ahmetov bastaǵan arnaıy delegasııa Ulybrıtanııanyń London qalasynda júr. Jumys sapary úsh kúnge (5-7 naýryz) josparlanǵan.
Oblys ákiminiń baspasóz qyzmetiniń bergen málimetterine súıensek, aımaq basshysy úsh kúndik issapardyń alǵashqy kúninde «Southwark Integrated Waste Management Facility» qatty turmystyq qaldyqtardy suryptaý jáne qaıta óńdeý zaýytyn aralap, «Transport for London» qoǵamdyq tasymaldaýdy uıymdastyrý júıesiniń qyzmetimen tanysypty. Issapardyń ekinshi kúninde Eýropalyq qaıta qurý jáne damý bankiniń birinshi vıse-prezıdenti Alon Pılokspen kezdesip, óńirdiń ınfraqurylymyn damytýǵa baǵyttalǵan ınvestısııalyq jobalardy júzege asyrýdyń ekijaqty seriktestik josparyn talqylapty. Eń mańyzdysy, jumys sapary barysynda oblys ákimi D.Ahmetov pen EQQDB prezıdenti Sýma Chakrabartı arasynda quny 5,6 mıllıard teńgeni quraıtyn «Shyǵys Qazaqstan oblysy qalalary men aýdan ortalyqtarynyń kóshelerin jaryqtandyrý júıesin jańǵyrtý» jobasyn qarjylandyrý týraly kelisimge qol qoıylypty. Joba júzege asqan jaǵdaıda Shyǵys Qazaqstannyń 630 myńnan astam turǵyny bar 6 qalasy men 11 aýdan ortalyǵyna 32 myń dana energııa únemdeýshi shamdar ornatylatyn bolady. Qazirgi ýaqytta atalǵan banktiń qoldaýymen 4,8 mlrd teńgege О́skemen men Semeı qalalarynda «aqyldy» jaryqtandyrý júıeleri engizilýde. Bul óz kezeginde 25 myń shamdy energııa únemdeýshi túrine aýystyrýǵa múmkindik bermek. Kelissózder barysynda aımaq basshysy men EQQDB prezıdenti О́skemende quny 29,5 mıllıard teńgeni quraıtyn qaldyqtardy zamanaýı jolmen joıý jáne qaıta óńdeý jobasyn da pysyqtap, birlese jumys isteýge kelisipti.
Elbasy 5 naýryz kúni Parlament palatalarynyń birlesken otyrysynda Qazaqstan halqyna arnaǵan «Prezıdenttiń bes áleýmettik bastamasy» atty Úndeýinde gazdandyrý máselesine erekshe mán bergen-di. Oblys ákimi Londondaǵy issaparynda osy mańyzdy máseleni de nazardan tys qaldyrmaı, atalǵan bank ókilderin quny 33,3 mıllıard teńge turatyn Zaısan, Úrjar, Tarbaǵataı aýdandarynyń 50 eldi mekenderin gazdandyrý jobasyna atsalysýǵa usynys bildiripti. Kezdesý qorytyndysynda Sýma Chakrabartı EQQDB-men birlesken jobalardyń sany men somasy boıynsha elimizdiń aımaqtary arasynda Shyǵys Qazaqstannyń kósh bastap otyrǵanyn jetkizip, ınvestısııalyq jobalardy júzege asyrýǵa qosqan úlesi úshin D.Ahmetovke «Alǵys hat» tabys etip, bıyl qarashada Pekınde ótetin Ortalyq Azııa forýmyna qonaq retinde qatysyp, birlesken jobalardyń barysy týraly baıandama jasaýǵa shaqyrypty.
Reti kelgende aıta keteıik, 2015 jyldan bastap, osy ýaqytqa deıin oblys ákimdigi men EQQDB 46,1 mıllıard teńgeniń 10 nesıelik kelisimsharty pen kelisimine qol qoıǵan.
Azamat QASYM, «Egemen Qazaqstan»