16 aqpan kúni Shyǵys Qazaqstan oblysynyń Dostyq úıi – Qoǵamdyq kelisim ortalyǵynyń alańynda «Biz – jańa halyqtyq Konstıtýsııa úshin» atty respýblıkalyq jastar forýmy ótti, sondaı-aq «Kóshbasshylar mektebi» jastar jobasynyń bastalǵany jarııalandy, dep jazady Egemen.kz.
Is-sharaǵa qatysýshylar jańa Konstıtýsııaǵa qoldaý bildirip, bul qujattyń qazirgi jáne bolashaq urpaqtyń turaqty damýyna negiz qalaıtynyn atap ótti. Talqylaý barysynda «Assambleıa jastary» RQB ókilderi, etnomádenı birlestikter men stýdentter assambleıalarynyń jastary sóz sóıledi.
О́ńir basshysy Nurymbet Saqtaǵanov óz sózinde tujyrymdamalyq ózgerister memlekettiń eń aldymen adamnyń múddesin qorǵaý qaǵıdattaryna negizdelgenin, Qazaqstan halqynyń ózekti qundylyqtary men qaǵıdattaryn kórsetýge, sondaı-aq saıası ınstıtýttar qurylymynyń tıimdiligin arttyrýǵa baǵyttalǵanyn atap ótti. Sonymen qatar, oblys ákimi Negizgi zańǵa engizilgen ózgerister jastardyń qoǵamdyq-saıası belsendiligin arttyrýǵa baǵyttalǵanyna nazar aýdardy.
«Assambleıa jastary» RQB tóraǵasy Tımýr Jumyrbaev jańa Konstıtýsııanyń jobasy qoǵamnyń túpkilikti múddeleriniń kórinisi ekenin, al jastardyń bul qujatty qoldaýy óte mańyzdy ekenin aıtty. Sonymen qatar, ol Qazaqstannyń Halyq keńesi – joǵary konsýltatıvtik organnyń qurylýy jastar úshin úlken múmkindikterge jol ashatynyna toqtaldy.
Is-shara barysynda Shyǵys Qazaqstan oblystyq máslıhatynyń tóraǵasy Denıs Rypakov sóz sóıledi. Ol jańa Konstıtýsııanyń jobasy sıfrlyq ortada azamattardyń quqyqtaryn qorǵaý týraly normanyń alǵashqy ret engizilip otyrǵanyn atap ótti. О́miri men jumysy ınternetpen tyǵyz baılanysty jas urpaq úshin bul senimdi quqyqtyq qalqan jasaıdy, al derbes derekterdi, jelidegi sıfrlyq aktıvterdi qorǵaý konstıtýsııalyq normaǵa aınalady.
Forým barysynda oblystyq Dostyq úıi – Qoǵamdyq kelisim ortalyǵynyń dırektory Ravıl Iýnýsov, Stýdenttik Assambleıalardyń jetekshisi Aleksandr Ýrmashov, Qazaqstan Respýblıkasyndaǵy Adam quqyqtary jónindegi ýákil janyndaǵy «Erkindik rýhy» jastar quqyqtary jónindegi komıssııasynyń múshesi Alına Kalısheva, Rıdder qalasyndaǵy «Assambleıa jastary» ókildiginiń jetekshisi Edýard Rynk sóz sóıledi.
Forýmǵa qatysýshylar jańa Konstıtýsııa jobasynda kórsetilgen shyǵarmashylyq múmkindikterdi keńeıtý, avtorlyq quqyq pen sıfrlyq qaýipsizdikti qorǵaý, quqyqtyq qorǵalý jáne ádilettilik kepildikteri, ekologııalyq jaýapkershilik máseleleri týraly da pikir almasty.