Búgin Zańnama jáne quqyqtyq aqparat ınstıtýty Qazaqstandyq qoǵamdyq damý ınstıtýtymen birlesip Qazaqstan Respýblıkasy jańa Konstıtýsııasynyń jobasyn keńeıtilgen saraptamalyq talqylaýdan ótkizdi. Eldiń jetekshi quqyqtanýshylary, saıasattanýshylary men áleýmettanýshylary Ata Zańnyń negizgi jańalyqtaryn qarastyryp, otbasy men neke ınstıtýtyn nyǵaıtý máselelerine erekshe nazar aýdardy, dep habarlaıdy Egemen.kz.
Kezdesý pánaralyq dıalog formatynda ótti. Ǵalymdar men sarapshylar ana men ákeni, balany qorǵaýǵa, sondaı-aq nekeniń konstıtýsııalyq mártebesine qatysty usynylǵan baptardyń tujyrymdaryn jan-jaqty taldady.
Talqylaýdy asha otyryp, Zańnama jáne quqyqtyq aqparat ınstıtýtynyń dırektory, zań ǵylymdarynyń doktory, professor Indıra Aýbakırova konstıtýsııalyq reformalardy ǵylymı turǵydan pysyqtaýdyń strategııalyq mańyzyn atap ótti.
«Jańa Konstıtýsııa jobasy – bul jańartylǵan normalardyń jaı ǵana jıyntyǵy emes, memleketimizdiń damýynyń jańa kezeńiniń kórinisi. Búgin quqyqtanýshylar men áleýmettanýshylardyń kúshin biriktire otyryp, biz konstıtýsııalyq jańalyqtardyń quqyqtyq turǵydan minsiz ári ómirsheń bolýyna jumys istep jatyrmyz. Otbasylyq qundylyqtardy qorǵaıtyn normalarǵa erekshe mán beremiz, óıtkeni otbasy – qoǵamnyń tabıǵı ári irgeli uıasy. Bizdiń mindet – mundaı ınstıtýttarǵa qazirgi zamannyń syn-qaterleri men halqymyzdyń dástúrlerine saı senimdi konstıtýsııalyq kepildik berý», dedi ol.
О́z kezeginde Qazaqstandyq qoǵamdyq damý ınstıtýty Basqarma tóraıymy, fılosofııa doktory (PhD) Juldyzaı Iskakova reformalardyń áleýmettik ólsheminiń mańyzyn atap ótti.
«Konstıtýsııa azamattardyń kútýlerine ún qatýy tıis. Zańnama ınstıtýtymen birlesken jumys quqyqtyq tujyrymdardy qoǵamnyń naqty suranystarymen úılestirýge múmkindik beredi, jeke adamnyń quqyqtaryn qorǵaý men ulttyń mádenı kodyn saqtaý arasyndaǵy tepe-teńdikti qamtamasyz etedi», dedi Juldyzaı Iskakova.
Otyrys barysynda jahandaný jaǵdaıynda dástúrli qundylyqtardy saqtaý máseleleri tóńireginde qyzý pikirtalas órbidi. Qatysýshylar qazirgi zamannyń ótkir áleýmettik syn-qaterlerin de nazardan tys qaldyrmady. Atap aıtqanda, jumyssyzdyqpen kúres máseleleri, sondaı-aq býllıng (qorlaý) jáne stalkıng (qýdalaý) sııaqty teris qubylystarǵa qarsy is-qımyldyń quqyqtyq tetikteri naqty qaraldy. Sarapshylar tulǵany qaýip-qaterdiń jańa túrlerinen qorǵaý úshin senimdi quqyqtyq tosqaýyldar qurý qajettigin talqylady.
Is-shara qorytyndysynda qatysýshylar atalǵan normalardy konstıtýsııalyq deńgeıde bekitýdiń ýaqtyly ekenin biraýyzdan atap ótip, olardyń qoǵamda joǵary suranysqa ıe ekenin aıtty.
Sonymen birge, sarapshylar bul konstıtýsııalyq kepildikterdi praktıkalyq iske asyrý zańdar men zańǵa táýeldi aktiler deńgeıinde odan ári muqııat pysyqtaýdy jáne naqtylaýdy talap etetinin erekshe atap ótti