Memleket basshysy Nursultan Nazarbaevtyń bes áleýmettik bastamasy halyqty joǵary deńgeıde áleýmettik qorǵaýdy qamtamasyz etýdi kózdeıtin, ekonomıkalyq qýatty memleket qalyptastyrýdy maqsat etken syndarly saıasatynyń jalǵasy bolyp tabylady.
Elbasynyń bastamalary Qazaqstan halqynyń ál-aýqatyna oń áser etetin bolady. «7 – 20 – 25» baǵdarlamasy kóptegen qazaqstandyqtardyń turǵyn úıge qatysty ótkir máselelerin sheshýge arnalyp otyr. Elimizdegi myńdaǵan adamdar qolaıly sharttar boıynsha páter satyp alýǵa múmkindik alady. Odan basqa, memlekettik ınvestısııalyq saıasattyń basym-baǵyty bola otyryp, turǵyn úı naryǵynyń basqa salalarǵa janama áseri mol bolady ári aralas salalarda ınvestısııalyq belsendilikti údete túsedi. Sondyqtan qoljetimdi ıpoteka tetikterin jasaýmen qosa, bul baǵdarlama otandyq qurylys salasyna serpin beredi, qurylys materıaldarynyń óndirisi ulǵaıady, jumys oryndary ashylady.
Elimizdiń ortalyq jáne soltústik óńirlerine gaz jetkizý jospary da elimiz úshin strategııalyq mańyzǵa ıe joba. Birinshiden, kóptegen qazaqstandyq otbasylar senimdi ári tehnologııalyq turǵyda óńdelgen otynmen qamtamasyz etiledi. Ol, ásirese aýyl turǵyndarynyń turmysyn jeńildetedi, úı sharýashylyǵy boıynsha atqarylatyn jumystardy anaǵurlym ońaılatady.
Ekinshiden, gaz qubyrynyń boıyndaǵy barlyq shaǵyn jáne orta bıznes kásiporyndary arzan ári qolaıly energııa kózine qol jetkizedi jáne ol óndiriletin ónimniń básekege qabilettiligine oń áser etýi tıis. Odan keıin qalalardyń ulǵaıýy men avtomobılderdiń kóbeıýine baılanysty kúrt ózgergen ekologııany saqtaý máseleleri de sheshile bastaıdy. Qazaqstannyń memlekettik saıasatynyń basym baǵyttarynyń biri – ekologııalyq qaýipsizdik máseleleri de júzege asady.
Prezıdent óz sózinde adam kapıtalyna, onyń ishinde stýdent jastardyń bilim alýy men damýyna erekshe nazar aýdardy. Búgingi stýdentter – elimizdiń, memleketimizdiń bolashaǵy. Sondyqtan olardyń qoljetimdi ári sapaly bilim alýyna jaǵdaı jasaý kerek. Qosymsha beriletin 20 myń bilim granty eńbek naryǵynda suranysqa ıe qosymsha ondaǵan myń bilikti mamannyń paıda bolýyna, jastardyń ómirden óz ornyn tabýyna múmkindik beredi. Odan basqa, 2022 jyldyń sońyna qaraı 75 myń oryndyq qazirgi zamanǵy stýdenttik jataqhana qurylysyn salý – uzaqmerzimdi damýǵa bet alǵan memlekettiń ilkimdi sharasy bolyp tabylady. Eń aldymen, jataqhana tapshylyǵyn keshendi túrde sheshý qazaqstandyq stýdentterge sheteldik joǵary oqý oryndarynan góri otandyq oqý mekemelerin tańdaýǵa múmkindik beredi. Bilim berýdiń sapasy men qoljetimdiligi, stıpendııa men jataqhanadaǵy qolaıly bólmeler oqý oryndaryn tańdaýda mańyzdy ról atqaratyna belgili. О́z aqyl-oıy men sanasyn Qazaqstan ıgiligine arnaǵysy keletin daryndy jastar úshin qosymsha áleýmettik satylar paıda bolady.
Elbasynyń bes áleýmettik bastamasy Qazaqstan halqynyń ál-aýqatyn arttyrýǵa baǵyttalǵan naqty ári tereń oılastyrylǵan is-qımyl jospary dep bilemiz.
Mıhaıl BORTNIK, Parlament Senatynyń depýtaty