Memlekettik organdar, Turǵyn úı qurylys jınaq banki ókilderi, zııaly qaýym jáne bilim ordasynyń oqytýshylary men stýdentteri qatysqan Qostanaı memlekettik pedagogıkalyq ınstıtýtyndaǵy basqosýda Nursultan Nazarbaevtyń «Prezıdenttiń bes áleýmettik bastamasy» atty Úndeýi keńinen talqylandy.
Onda ınstıtýt rektory, professor Erkin Ábil Elbasynyń Úndeýinde aıtylǵan áleýmettik bastamalarǵa toqtalyp ótti. «Elbasy Nursultan Nazarbaevtyń halyqqa joldaǵan «Prezıdenttiń bes áleýmettik bastamasy» atty Úndeýindegi atap ótken bes áleýmettik máselelerdiń barlyǵy da búgingi kúni ózekti. Ásirese stýdent qaýym úshin jataqhana máselesi erekshe nazarymyzdy aýdarǵany málim. Elbasy jastar úshin úlken múmkindikter jasap otyr. Bilim grantynyń bólinýi memlekettiń jastarǵa jasap otyrǵan orasan zor qamqorlyǵy», – dedi ınstıtýt basshysy.
Oblystyq jastar isi jónindegi basqarma basshysy Kenesh Álimjanov Elbasy Úndeýindegi áleýmettik máseleler jastar men stýdentter úshin úlken múmkindik ekenin, soǵan oraı talpynys kerektigin tilge tıek etti.
«Elbasy Úndeýiniń birinshi bastamasynda aıtylǵandaı, ár adam úshin eń bastysy, baspana bolyp tabylady. Ásirese jastar oqýdy bitirip, eńbekke aralasqanda baspana kerek bolady, otbasyn qurǵanda onyń qajettigi arta túsedi. Buryn jastar oqýdy bitirisimen baspana ala almaıtyn, birneshe jyl jalǵa alǵan páterde, úıde turady, ábden qarjy jınap, kezekke turyp, ol kelgen soń ǵana alatyn. Banktiń paıyzdyq ústemesi de joǵary bolatyn. Mine, endi Elbasy «7 – 20 – 25» memlekettik baǵdarlamasyn usynyp otyr. Bul árbir jas úshin Memleket basshysynyń ákelik qamqorlyǵy dep aıtýǵa bolady», – dedi K.Álimjanov.
Nursultan Nazarbaevtyń «Prezıdenttiń bes áleýmettik bastamasy» Úndeýimen stýdentterdiń ózderi tanysyp, qýanyshtaryn bildirdi. Ekinshi kýrs stýdenti Darhan Musaqov – bolashaq tarıhshy. Ol «Serpin» baǵdarlamasy boıynsha Taraz qalasynan kelip bilim alyp júr. Elbasynyń Úndeýinde aıtylǵan máseleler jastardyń áleýmettik turmysyn kótererine ol senimdi.
«Men qazir páter jaldap turamyn. Zamanaýı talappen salynǵan jaıly jataqhana búginde ár stýdenttiń armany ǵana bolatyn. Bolashaqta jaıly jataqhanalar stýdentterdiń turmysyn kótereri sózsiz», – deıdi Darhan Musaqov.
Basqosý sońynda ınstıtýt rektory E.Ábil memlekettiń osyndaı qamqorlyǵyna stýdent jastar tek jaqsy oqýymen, sapaly bilimimen jáne bolashaqta bilikti maman bolýymen jaýap berýi tıis ekendigin aıtty.
Názıra JÁRIMBET, «Egemen Qazaqstan»
QOSTANAI